Shillong, Jymmang 15 : Khyndiat sngi hadien ka jingmih khubor ba u MLA ka All India Trinamool Congress (AITC) na Mawsynram, Bah HM Shangpliang u thmu ban pan tiket noh na ka UDP na bynta ka elekshon kaban long ha u 2023, na ka liang u President jong ka UDP Mawsynram, Bah O Suiñ u la ong ba lada kitei ki khubor ki dei kiba shisha, kiba kwah ban pan tiket na ka party ki dei ban ïaid da ka lynti.
Utei u rangbah uba dei ruh u kyrtong ba ïakhun ïa ka elekshon MLA na ka seng UDP ha u 2018 u la ïathuh ba naduh ba u rem u la ïai neh ha ka party bad trei borbah ruh na ka bynta ban kyntiew ïa ka party ha kine snem baroh shi katta.
“Lada don mano mano ba kwah ban ïakhun na ka tiket UDP ki hap ban ïaid lyngba ka Circle namar haduh mynta ym pat don ba pyntip ïa kane. Haduh mynta nga dei ma nga u President ka UDP Mawsynram circle hynrei ki nongïalam kiba hajrong ki khlem pyntip ïa nga ba la don kiba pan tiket na ka bynta ka elekshon ha u snem 2023,” u la ong.
Halor ka jingkylli ba kaei pat ka sienjam ba un shim lada ka party ka ai tiket noh ïa u Bah HM Shangpliang, utei u rangbah u la ong ba u sngewskhem ba ka UDP kan ym pynduh satia ïa ka tiket namar u la ïai neh bad u la trei borbah na ka bynta ka party.
