Shillong, Jymmang : U MLA ka Mawlai u Bah PT Sawkmie ha ka sngi Saitjaiñ ba la lah u la dawa ba ka tnat Veterinary ka dei ban thung kynhun tohkit mardor pyrshah ïa ki ophisar jong kane ka tnat kiba shong ha khyrdop Umling, Ri Bhoi District halor ka jingkynnoh lum pisa beaiñ pyrshah ïa ki.
Ka jingdawa thung kynhun tohkit jong u MLA ka long hadien ba u la ïohi lyngba ki khubor bad lad pathai khubor ïa ka jingkynnoh ka Khasi Jaiñtia Butcher Welfare Association (KJBWA) pyrshah ïa ki ophisar ka Veterinary ba ki lum pisa beaiñ na ki nongkhaïi Masi.
“Ha ka jaka ban ïoh ïa ka doh masi kaba bang bad ka ba bha, hynrei tyngkhat imat ngi ïoh bam ïa ki doh muid,” ong u MLA bad u ba la ong ruh namar kaba bun ki doh masi ki don ka jingmad kaba bang, hynrei ki don ki khep ba kine ki doh kim don jingmad shuh, kaba pynsuba jur bha bad ka jingbuh jong ka veterinary ïa ka khyrdop ha Umling ban khmih bad bishar bniah ïa ki masi, la ki long kiba biang ne em ban bam, hynrei ha ka jaka jong kata, la ïohsngew pynban ïa ka jinglum pisa beaiñ na ki nongkhaïi da ki ophisar ka tnad veterinary.
Kumta u MLA u la kyrpad ïa kaVeterinary ba ka dei ban ïa trei ryngkat bad ka KJBWA. U pynpaw ruh ba na ka ot masi ka long ka jingkyrkhu kaba khraw haba ïa dei bad ka ïohkam ïohjam, ki nongot doh la ka jong, kiba lum snieh la ka jong, kiba sait snier la ka jong bad kumta ter ter.
