Jowai, Jymmang 15: Ka jingsniew bad ka jingbun ki thliew ki syar (potholes) ha ki bynta jong u surok Jowai-Shilliong (National Highway NH-6) kala sdang biang ban jur katba dang mih ki sngi watla ïa une u surok la dang shu dep shna maramot dang ha kine ki kyndiat bnai ba la dep.
Kumba long mynta la sakhi naduh na Ummulong West Jaiñtia Hills haduh shwa ban poi jong ka shnong Mawryngkneng East Khasi Hills la ïohi ïa shibun ki thliew ha surok bad ki don ruh ki bynta ba kham jur ka jingsniew shaba palat kaba la buh jingeh shi katdei eh ïa ki nongñiah kali ban ïaid ne kiar ïa kine ki thliew, kumba la tip ba une u surok NH-6 u dei uba pynïasoh ïa kiba bun tylli ki jylla jong ka thaiñ Shatei lam Mihngi (North East).
‘Lada dei ki nongñiah kali kiba wan namar ka jylla ne kiba ju leit lynti na une u surok teng khat ka lah ban buh jingma ïa ki ha kano kano ka por, khamtam ha kum kine ki por slap ba dap da ka um suda ha kitei ki thliew bad ki kali ki lah ban hap bad liat ha kitei ki thliew kumba la shu pynap shrip’.
Wat na ka liang ka ïing bishar ba don burom ruh dang shen kala dep ban btah ïa ka sorkar jylla ban kan pynbha maramot ïa une u surok NH:6 bad hadien ba la dep maramot, kane ka jingjot jingpra jong u surok kala sdang biang mynta.
Ym lah ban tip na ka ei ka daw ba ka sorkar jylla kam lah ban leh ïa kaba bha tam bad kaba neh slem tang shisien leh ha ka por ba maramot ïa ka surok bad kane ka jingmaramot surok na ka por sha ka por ka shait jia kumne shi kumne kumba pynsei ei ïa ka pisa paidbah.
Lah ban long ba ka jingpyntrei tangdep khlem da biang bha ka rukom kaba dei ban siang rong kala wanrah biang ïa ka jingpei thliew jong ka surok nalor sa ka por slap jong ka aiom lyiur bad kumjuh ka jingtwa khyndew ha ki bynta ka surok.
Ka sorkar jylla kala dei ban shim ka jingkitkhlieh hashwa ban maramot ïa ka surok dei ban leh ïa kaba bha tam, khnang ba kan long ka jingmyntoi ïa ka jylla bad kumjuh ïa ki paidbah nongleit nongwan.
