Palat 200 tylli ki kali ka tnad Pulit pyllait u Myntri Rangbah, ka sien nyngkong ba pyllait bun eh

Shillong, Naiwieng 24: U Myntri Rangbah ka Jylla Conrad K Sangma hynne ka sngi Thohdieng, ula pyllait paidbah ïa palat 200 tylli ki kali kiba la mang na ka bynta ka Tnad Pulit.
Kine ki kali ki kynthup ïa 80 tylli ki Bolero bad ki Camper, 140 tylli ki thuk thuk bad 6 tylli ki crane.
Kane ka dei ka jingthied kali kaba bun duh ha ka histori jong ka Tnad Pulit.
“Kine ki kali bad ki thuk thuk kin ïarap ïa ki Pulit jong ngi ha ka leit ka wan, ban sted ha ka jingpyndep ïa ka kam bad jingshakri ba kham bha ïa ki paidbah” ong u Conrad ha ka jingïalang.
Kiba la ïadonlang ha kane ka sngi ki kynthup ïa u Symbud Myntri Rangbah uba peit ruh ïa ka tnad kam pohïing u Bah Prestone Tynsong, u Symbud Myntri Rangbah Bah Snïawbhalang Dhar, ka Myntri ka Koit ka Khïah Kong Ampareen Lyngdoh bad kiwei kiwei.
“Ngi la sam ruh ïa kiwei ki tïar ba kongsan sha ki Pulit ka Shillong Traffic bad aiti ïa ki kor Computer bad Laptop bad kiwei ki tïar IT sha ki Ophisar jong ngi kiba don ha ki District bapher bapher” ula bynrap.
Ul pyntip ruh ba ka dei ka jingangnud jong ka Sorkar ban pynkylla janai ïa ka jingtreikam jong ka tnad Pulit lyngba ka jingpynbïang ïa ki jingdonkam baroh bad kane ka jingthied kali kaba heh duh, kan ïarap ïa ka Sorkar ban ai ka jingshakri ba kham bha sha ki paidbah ka Jylla.