Ki Syiem, ka District Council ki dei ban khylliap noh ïaka buit jong ka jingdie jaka sha ki shipai BSF

Nongpoh, Jymmang 14: Ka seng Khasi Student Union, North Khasi Hills District Unit kala pynpaw ka jingpyrshah jur halor ka jingthmu ban lilam sop sop ïaka jaka kaba da ki spah akar sha ki shipai BSF naka bynta ban shna ktem shipai kaba dei ruh ka jaka kaba don ha ka thaiñ khappud ka Meghalaya bad Assam.
Haba phah ïaka kyrwoh, naka liang ka seng lyngba u Samla James Hitler Mawphñiang General Secretary ka KSU, NKHD u la pynpaw ba kum ka seng ka pyrshah jur ïaka jinglong kloi ki nong ïasylla,ki myndie ri kiba khwan myntoi shimet bad ki rhah sbai halor ka jingïaid shakhmat jong ki trai jaka bad ki dalal ban die ïaki jaka ha Umsen sha ki shipai BSF na ka bynta ban shna ïaki ktem shipai, da ki spah akar da kaba ïa sylla sop sop, katei ka jaka ka dei kaba don ha ki thaiñ khappud bad ka jylla Assam.
“Ka KSU NKHD Unit kan ïai pyrshah ïaka jing ïasylla kito ki langïong namar kala ïohi shai kdar da la ki jong ki khmat ha kaba bun ki jaka ha sor la shu klun jubor bad shah thombor ki shnong khasi kiba don marjan bad ki ktem shipai, nalor ka jingshah khang lynti don ruh ki bynta ha kaba ka bor shnong ka hap tyngkhuh ïaki bor shipai kumba ngi la sakhi ïaki shnong kum ha shnong Lawsohtun, Mawpat, Mawshubuit, ka Them Basuk bad ka Laitkor kiba ba dei ki shnong ba don marjan bad ki ktem shipai” la pynpaw u samla James da kaba bynrap ruh ba ha Mawlai man ka por ha CRPF camp ka ju mih ka jingshah bom shah tied ki samla na kawei ka por sha kawei pat, ka jingknieh jaka ban shna ïaki gate shipai ha shnong Pyllun, Umïam, lada ngim sngewthuh kloi kine kin sa long kylla ki jingshah kyrtoh hadien habud lada ngim pat ïoh jingsneng na kaei kaba la jia bad ngim kwah shuh ba ki jaka Khasi kin ïai mad sah ïa kijuh ki jingjia hynrei ngi la dei ban ïoh ka jinghikai ba ngin adkar.
“Ngi la ïohi shai ha kaba bun ki bynta ka sor bad khapsor kila don ki ktem shipai kum jong ka Assam Riffles, Air Forces, BSF, CRPF, Gorkha TC bad kiwei kiwei, nuksa na ki shnong ba don ki ktem shipai ka long ka jingdon ki shipai ha jan kim wanrah jingmyntoi ei ei ruh em hynrei ka wanrah ban ka jing duhnong ïaki jaka ki puta bad ka jingshah ktah ki jaka rep jaka riang, lada ngi pyrkhat ïaki jaka lehkai, ki hospital bad ki skul ka jing myntoi bunsien hi ka leit sha ki khun shipai bad ki khun heh spah” u la bynrap.
Ka jingthmu ban die ïaki jaka ha ki thaiñ Umsen ka wanrah ka jingartatien ïaka sorkar jylla, ka Hima bad ïaka District Council namar ka jing pynstet jong ki ban die noh ïaki jaka hapdeng ba ki paidbah ka jylla ki dang sah umdum halor ka kam pynbeit pud pynbeit sam hynrei ka jingdonkti jong ki ban die ïaka jaka sha ki shipai ka pyni ïaka jingartatien shi katdei eh ïa u paidbah ka jylla.
Naka liang ka seng ka kren shai ruh sha ki nongmihkhmat ba ki dei ban pyrkhat bad kylla ka jingmut jing pyrkhat wat kwah ban pynlong Jammu and Kashmir bad Nagaland ïaka jylla Meghalaya namar kitei ki jylla ki mad ïa bun ki jingia umsnam namar ka jing leh meng ki shipai, namar haba ngi ïaid na ka surok na Shillong sha Mylliem haki kynroh shipai 7mer phin ïohi ïaki kyntien (TRESPASSERS WILL BE SHOT lane ÏA KIBA ÏAID LYNGBA YN SIAT”), kitei ki kyntien ba pynpar ñiangkhriat bad lada bakla lei yn poi sha ka jingïa ïam briew, ka dei ba ngin ïoh jinghikai lada ha Sor Shillong ki nud ban byrngem pylleiñ pylleiñ, kaei ban jia ha ki thaiñ kiba kham pajih na ka nongbah.
Ki shipai BSF ki dei ki nongïada khappud kumno u kwah ban buh ktem hajan khappud Assam u dei ban ïada na ki nongshun bar ri ym ba un shong ha khappud Jylla kaba dang don hapdeng ka jing shongsuk shong shngaiñ, ka dei ïaki ban pynleit jingmut sha thaiñ khappud namar ka jing jyllei ki mynder ri Bangladeshi ban rung tuh bad wat ki dohïong runar ruh ki la shim kabu ban pynlong jaka rungtuh jaka mihtuh namar ka jingbym shimkhia jong ki shipai khappud.
Ka Seng KSU NKHD Unit lyngba kane ka kyrwoh ka pynpaw shai kdar ba kan bteng ban ïai pyrshah ïaki jingthmu jong ki nong ïasylla, ki dalal, ki Hima kumta ter ter ïaka jingthmu sop sop ban pynkloi ïaki kot ki sla ban die noh ïaka jaka sha ki shipai BSF.
Ki Syiem, ka District Council ki dei ban khylliap noh ïaka buit jong ka jingdie jaka sha ki shipai BSF wat pyrshang ban ai NOC namar u paidbah u tip ba phi dei ka stieh ka Jaidbynriew ban ïada ïaka khyndew ka shyiap lada phi tang shu bakla bad lilam ki paidbah ka jylla kin sa ïoh ka jubab lyngba ka kam jong phi bad ka KSU kan sa ai da ka jubab kaba tyngeh, la bynrap ka kyrwoh naka seng KSU