Shillong, Naiwieng 21: Ka Sorkar Jylla shen kan sa ai jingthoh sha ka National Council of Educational Research and Training (NCERT) ban kyrpad na ka bynta ban ai jingbit ban pyndonkam lang ïa ki kot jong ka naduh klass I haduh klass X naduh u snem ban wan.
ïa kane ka rai la shim ha ka jingïalang ba la long ha ka Lah Sngi U Blei hapoh ka jingpynïaid u Myntri ka tnad pule puthi u Rakkam A Sangma bad ka Textbook Committee , ki heh ka Meghalaya Board of School Education (MBOSE),ka Directorate of Education Research and Training (DERT) bad ki ophisar jongka tnad pule puthi hi.
U Myntri ka Tnad Pule Puthi ula ong “Ngi la rai ban sa thoh noh mardor sha ka NCERT ba kan ai jingbit ïa ka sorkar jylla ban pyndonkam ïa ki kot jongka ha une u snem ban wan”.
U ong ba ka Sorkar Meghalaya dang shen ka la rai ban pyndonkam noh ïa ki kot ka NCERT naduh klass I hsfuh Klass X. Shuwa kane, ka Sorkar kala shim ïa kane kajuh ka rai na ka bynta ka klas XI bad klas XII naduh u snem 2018.
“Ngi la pynlong ïa ka jingïalang buddien ha ka Lah Sngi U Blei namar shuwa ban sdang ka samoi ban wan, ngi hap ban long kiba la khreh haba ïadei bad ki kot ba dei ban ïoh hapoh ka shiteng bnai jong u Rymphang” ong u Rakkam haba bynrap “Shisien ba ngi la ïoh jingbit, ngin sa shim ïa ki rai ba donkam bad ngin sa phah shon ïa ki kot”.
Nalor kane, u Myntri ula pyntip ruh ba ka Tnad ka la thung ïa ka scrutiny committee.
“Ka Committee kan shong bishar bad ki stad ki jhad jong ngi halor ki kot ba mynta jong ka NCERT, ha ka ban khmih la ki don ne em kino kino ki bynta ne ki lynnong ki bym ïahap bad ka jinglong jingman ha Jylla. ïa kine kiei kiei baroh yn sa shong bishar da ka Committee” ula ong.
Haba pynpaw ba ka Sorkar ka la trei shitom ban wanrah hi da la ka jong ka curriculum ka Jylla kham kloi kat kaba lah, u Rakkam ula ong “Shisien ba ngi la don la ka jong ka curriculum, ka MBoSE, DERT bad ka Tnad Pule Puthi kin sa pynmih ïa la ki jong ki kot ki ban bynrap, weng ïa ki lynnong na ki kot ka NCERT kat kum ka jingdonkam hapoh ka Jylla”.
“Ngin ym pyntreikam pura satia ïa ki kot ka NCERT kumba ki long hynrei ngin sa bynrap ruh ïa ki jingthoh kiba ïadei bad la ka jong ka Jylla” ula bynrap.
