Mairang, Jymmang, 13: Ka jingther jong u lapbah uba jur ha ka sngi Thohdieng ka la wanrah ïa ka jingshlei um kaba jur ha Wah Kynshi kat haduh ba ka um ka la tap wat ïa ka surok ïaid kali bad nalor kata la sakhi ruh ïa ka jingtwa khyndew ha kiba bun ki jaka.
Ha kane ka jingshlei jong ka Wah Kynshi, arngut ki nonghikai jong ka Shyrwang Upper Primary School ki la sah kut hapoh skul kumba ar kynta tam namarba kim lait shuh ban mih shabar na ka daw ba ka um ka la tap mar shiteng ïa ka iing skul.
Kine ki arngut ki nonghikai ha ka jingïakren bad u nongthoh khubor hadien ba la ïoh sei ïa ki na skul, ki la ïathuh ba ha ka por mynstep kumba 9:00 baje eiei ki la bthah ïa ki khynnah skul ban leit phai noh sha la ing namar ka jingjur shaba palat jong u slap.
Dei ha kum kane ka por, kine ki arngut ki nonghikai ruh ki la thmu ban mih noh napoh skul hynrei na ka daw ba ki la klet ïa kawei ka kot ba donkam ki la leit phai biang sha skul.
Ki la ïathuh, katba ki dang don hapoh skul, ka um na ka Wah Kynshi ka la shlei kynsan bad wan tuid sha skul kat haduh ba kim lait shuh ban mih na kane ka skul.
Ïa kine ki arngut ki nonghikai skul, la ïarap ban pynlait da ka kynhun Search and Rescue Team ban shong da ka lieng kynda lem bad ka jingïarap jong ki paidbah.
U Sordar jong ka shnong Kynshi Bangla u Bah Aibanrikupar Syiemlieh ula kyrpad ïa ka tnat ka Rep ka Riang na Eastern West Khasi Hills District ban phaikhmat lem sha ki nongrep hadien ba ka um ka la pynjulor lut ïa ki jaka rep phan jong ki.
Katkum ka jingïathuh jong u Bah Syiemlieh, kane ka jingjur jong u slap naduh ka por kumba 5:00 baje eiei mynstep ka la pynjulor ïa ki post ilektrik, ïa ki ing ki snem na ka jingtwa khyndew bad ki surok kiba la twa.