Ha ka taïew ba nyngkong u Nohprah yn pynbna ka KHNAM ïa ki kyrtong MDC
![](https://mawphor.com/wp-content/uploads/2022/06/KHADC.jpg)
Shillong, Naiwieng 15 : Ka Khun Hynniewtrep National Awakening Movement (KHNAM) ka la rai ban pyllait ïa ka list ba nyngkong jong ki kyrtong MDC jongka sha ka KHADC ha ka taiew ba nyngkong jong u bnai Nohprah mynta u snem.
Haba ïakren bad u Working President ka KHNAM u bah Thomas Passah u la ong ba ïa ka List ba ar pat yn sa pynmih ha ka taiew ba khatduh jong u Nohprah ne taiew ba nyngkong u Kyllalyngkot 2024.
U la ïathuh ba ka KHNAM kan ïa aireng tang ha ka election MDC sha ka KHADC bad ka la pynkhreh ban pynïakhun na baroh 29 tylli ki constituency. Kat haduh mynta ka party ka la ïoh pdiang ïa ka jingpan tiket na ki 15 haduh 16 tylli ki constituency.
U la ïathuh ba halor kine kiba pan tiket ka Election Committee kan sa shong bishar ïa baroh ki jingdonkam namar ka party ka phai khmat ruh sha ki briew kiba don ka kyrdan bad ka iktiar ban shakri ïa ki paidbah bad khamtam eh kito kiba kohnguh ïa ka party namar ha KHADC ym don aiñ ban khang ïa ka jingkyntiap seng . Ka party kan kham phai khmat ruh sha ki samla ha kane ka kynti.