Shillong, Naiwieng 06 : U Nongïalam ka BJP ba dei ruh u Myntri ka sorkar jylla, Bah AL Hek ha ka sngi Nyngkong u la ong ba ka BJP ka don ka jingkyrmen ba kan jop ha Shillong kumjuh ruh na Tura Parliamentary seat ha kane ka elekshon MP kaban sa long shen.
Haba kren bad ki lad pathai khubor, u Bah Hek u la kob ba ka BJP ka la don lypa ki nongkyrshan kiba radbah kiba kyrshan ïa ka BJP lane ka vote bank kaba skhem.
Shuh shuh u ong ruh ba ka rai ba ki party ba don ha ka MDA ban pynieng kyrtong lut ha kane ka elekshon ka la nang pynrhem bad ai mynsiem shuh shuh ïa ka BJP.
“Ka BJP ka la don lypa ka vote bank kaba skhem bad kane ka vote kan ym leit shaei shaei ruh. Kumta, ka BJP ka don ka jingkyrmen kaba skhem naba ki la don bun lypa ki kyrtong kiba thmu ban aireng la ka long naduh ka National People Party (NPP), United Democratic Party (UDP), Trinamool Congress (TMC), Voice of the People Party (VPP) bad bun na ki kim don satia ïa ka vote bank kaba skhem,” u la ong.
U ong ruh ba ka BJP kum ka National Party kan sa pynieng kyrtong ha baroh ar jaka, kata ha Shillong bad Tura.
Halor ka jingkylli la un ïakhun hi na Shillong, u Bah Hek u la ong ba um lah satia ban rai hi halor kane kam namar baroh ka shong ha ka rai jong ki nongïalam na Delhi ban shim ïa ka rai kaba khatduh.
Shuh shuh u ong ruh ba na ka liang u president ka party u Rikman G Momin u la pyntip ba ki don lai ngut ki kyrtong kiba pan tiket na Shillong seat.
Hynrei namarba u President um pat thaw ïa ka state executive comittee bad ki nongkitkam kum ka jingjied ïa ki kyrtong kam pat don satia. “Ngam pat tip kiei kine ki lai ngut ki kyrtong bad ngam tip ruh la ka kyrteng jongnga ka donlang ne kumno bad lada ka don ruh kan bha bad lada kam don ruh ngin kyrshan lang ïa uno uno u kyrtong,” bynrap biang u Bah Hek.
