ïatreilang ka Mawlai Town Dorbar bad ka Manbha Foundation ban ïaleh thma pyrshah ïa u drok

Shillong, Naiwieng 6 : Da ka jingshimkhia halor ka jingkiew ka jingpyndonkam ïa u Drok, ka Mawlai Town Dorbar (MTD) ka la shim ïa ka rai rangbah ban ai jingïarap ïa ki riewshimet kiba ïakhun ban lait naka jingkyrni haka jingdih drok.
ïa kane ka sienjam la shim ryngkat bad ka jingïatreilang bad ka Manbha Foundation, ha kaba kin pyrshang ban ai jingim ïa kito kiba ïakhun pyrshah ïa ka jingkyrni ha ka jingdih drok lyngba ka De-addiction bad Rehabilitation Programme ha Mawlai Mawkynroh Rehab Centre.
Ka thong kaba hakhmat jong kane ka shnong ka thaw ka long ban tehlakam ïa ka jingpyndonkam ïa u drok hapoh ka thaiñ Mawlai bad ka jingktah jong une u jingdih ba sniew ïa ka imlang sahlang.
Ki la shim ruh ba ka mat jong u drok kam dei shuh tang kaba ktah ïa ka ïing ka sem hynrei ka donkam ïa ka jingïatreilang da baroh da ka jingthmu ban pynshai bad pynsngewthuh shaphang ki lad ai jingsumar. Hynrei kan long ruh kum ka rynsan ban pdiang ïa kane ka jingkylla kynsan ha ka imlang sahlang bad ban pynpaw shai ïa ka jingdonkam ban tuklar noh mardor.
Naduh bala sdang, kane ka prokram ka la ïoh ïa ka jingphai khmat na kiba bun ki nongdih drok kiba kwah ban ïoh ïa ka jingsumar lyngba ki de-addiction center bad kumba long mynta ki don 21 ngut ki riewshimet kiba la pynrung kyrteng ha katei ka prokram, kaba la ïatreilang hapdeng ka Mawlai Town Dorbar bad ka Manbha Foundation.
Ha ka jingplie ïa kane ka prokram la ïadonlang ka Dr. Rika Lamar jongka Manbha Foundation, u SP (City) ka East Khasi Hills Bah Vivek Syiem, u Vice Chancellor ka NEHU u Prof. PS Shukla, Bah Teibor Pathaw MDC ka Mawlai Constituency.
La wan ruh ban ïashimbynta lang ha katei ka jingïalang da ki nongïalam shnong bad ki bahaïing bahasem jong kito dkhot kiba ïashim bynta ha katei ka prokram.