Jowai, Naiwieng, 06: Shi bynta na ka jingrakhe ïa ka jingdap 75 snem ka National Cadet Corps (NCC) kawei na ki kynhun kaba ai mynsiem ïa ki samla pule ban rung ha ki kam shipai, ha ka Lah sngi u Blei ka la sdang ïa ka jingïaid rally da ki kali sha ki hynñiew tylli ki jylla hapoh ka thaiñ Shatei Lammihngi halor ka phang, “Navigating Challenges, Forging Leaders.”
Ïa ka NCC la pynkha ha ka 16 tarik, Ïaiong, 1948, lyngba ka aiñ jong ka Parliament bad la plie ïa ka ha ka 15 July 1948. La rakhe kyrpang ïa kane ka jingdap 75 snem da ka jingïaid rally da ki kali kaba 21 sngi naduh ka 6 tarik Naiwieng haduh ka 26 Naiwieng 2023 kaba kynjoh ïa ka jingjngai kaba 3500 Kms ïa kaba yn pynkut ha nongbah Guwahati.
Ha Jowai, la rakhe ïa kane ka sngi ha Kiang Nangbah Govt. College Auditorium da kaba pdiang burom ïa u Major General Gagan Deep, ADG NCC ula long kum u kongsan ha ka jingwan ïuh kjat jong u ryngkat ka jingdonlang jong ka Principal jong ka College ka Dr (Mrs) E.M. Blah, ki samla pule NCC, ki khynnah skul ki nonghikai nalor kiwei kiwei.
Hashwa ban poi u Major General Gagan Deep la pdiang burom ïa u da ki khynnah NCC jong ki ar tylli ki College kata ka Kiang Nangbah bad Thomas Jones Synod College.
Haba ai jingkren u Major General Gagan Deep ula pynsngew kaba donkam eh kum ki NCC ki dei ban don ka jingïatylli bad ka akor burom na ka bynta seng ïa ka lawei ba phyrnai.
U kyrmen ba kane ka jingïaid rally kaba la sdang na nongbah Shillong bad ban wan hiar ha Jowai shipor kan ïarap shibun ïa ki samla pule ban rung hapoh ka NCC da ka nongrim kaba skem.
La pynshongshit shuh shuh ïa kane ka prokram da ki jingrwai bad ki jingshad tynrai na ki khynnah NCC.
