Shillong, Jymmang, 12: Ka Meghalaya SSA School Association (MSSASA) ha ka sngi Palei ka la phah da ka dorkhas sha u Myntri ka tnat Pule Puthi ka Sorkar Jylla u Bah Lahkmen Rymbui ban dawa ïa ka Sorkar Jylla ba kan thung nonghikai ha ki skul SSA ha Lower Primary bad Upper Primary kiba la shu sah thylli na ka ka jingiehnohkam bad ka jingkhladnoh jong ki nonghikai bad kiwei kiwei de ki daw.
“Ki Managing Committee jong ki skul SSA LP bad UP ki ladep phah ïa ka jingtyrwa sha ka Sorkar ban ïoh jingmynjur na ka Ophis jong u State Project Director SEMAM-SSA ban pynbna paidbah ïa ki post ba thylli bad ban pynlong ïa ka interbiw katkum ka jingbthah ba la pynmih da ka ophis u State Project Director SEMAM-SSA ha ka 3 tarik, Nailur, 2021. Hynrei haduh kine ki sngi ki bor pynïaid skul kim shym la ïoh jubab satia bad buh ïa ki bor pynïaid skul bad ïa ki kmie ki kpa jong ki khynnah skul ha ka umdum,” ong ka dorkhas ba la soi da u President u Bah Aristotle Rymbai bad u Secretary u Bah Ralbingland Nonglait.
Katkum ka dorkhas, ka MSSASA ka la pyntip ba la jan hynriew haduh khatar bnai ki skul SSA Lower Primary bad Upper Primary ha ka jylla ki don tang iwei ne arngut ki nonghikai bad don ki skul ki bym don nonghikai.
