Khliehriat iaiong 12: Da ki phew hajar tylli ki kali ki la sahkut ha ka jingdheng kali ha surok national highway ha Narpuh East Jaiñtia Hills District, ka daw jong ka jingdheng kali ka dei namar ka jingwan tuid lynshop ka um lem kaba heh lem bad ki mawria ha surok national highway ha Lumshnong hajan ka Tool Gate.
Kane ka jingdheng kali ka la sdang naduh ka por kumba 6.30 mynstep bad ki kali ki sdang ban lait suki suki haduh ka por kumba 2 baje jan miet.
Ki pulit jong ka Lumshnong Police Station, ki la shim khia haduh katta katta ban pyniaid beit iaid ryntih ïa ki kali ba kynthup ki kali rit bad ki kali heh kiba la sahkut ha kane ka jingdheng kali kaba lla bun-bun kynta ha surokbah.
Ka jingwan lynshop ka um, ki maw ria nalor lum kaba la long kum ka kshaid, ka la hap beit sha surok bah ba iaid ki kali bad ka la wanrah ka jingthut ha ka leit ka wan jong ki paidbah kiba dei iaid lyngba na katei ka surok national highway, dei ruh lyngba ka jinghsim khia ki nongtrei jong ka National Highway Authority of India kiba la wan pynpoi mar mar ïa ki puh shi lum bad ki kor ki bor kumta la lah ban pyllait ïa kane ka jingdheng kali.
