Hiar ki dkhot ka KSU ban ïa pyni bor kylliang bad shah pakhang lynti ha ki Magistrate bad ki bor Pulit

Nongpoh, Jymmang 12: Da ki hajar ngut ki nongtrei bar jylla mynta ka sngi ki la mih ban ïa khih paidbah ban pyrshah halor ka jingshah kynnoh ba ki la shah thombor ha ki kynhun ba wan ban jurip ïa ka Karkhana hynnin ka sngi ha Umïam bad wat la kim shym la pynpaw ba ki dei ki dkhot ka KSU bad phewse kane ka kam ka la paw shai ba dei ki dkhot ka KSU kiba la leit ban jurip kaba dei hadien ba na ka liang ka KSU ka la hiar mynta ka sngi ban ïa pyni bor mar kylliang ïa kitei ki nongtrei bar jylla bad phewse ki la shah pakhang lynti noh ha ki Magstrate bad ki bor pulit ka Ri Bhoi.
Ïa kane ka jingïakhih ki nongtrei bar jylla na ki Karkhana bapher bapher kiba don ha MIDC Industrial Estate Umïam la pynlong da ki nongtrei bar jylla ha Riangdo Veneer Private Limited kaba don ha Umïam. Da ki hajar ngut ki nongtrei bar jylla ki la mih ban pynpaw ïa ka jingpyrshah halor kata ka jingshah kynnoh ba ki la shah bom shah shoh ha kita ki kynhun kiba la wan ban jurip ïa kitei ki Karkhana kiba don ha Umïam.
Kum ban pynpaw, ka KSU Umïam Circle hynnin ka sngi ka la hiar ban leit jurip ïa ki Karkhana kiba don ha Umïam, bad na ka daw ka jingdon ki bar jylla kiba wan ban trei bylla beaiñ khlem da don ki kot ki sla ba ka KSU ka la ioh jingtip ba la don ki kynhun bar jylla kiba la wan ban trei bylla hynnin ka miet jong ka sngi Baar jong ka taiew, ka la pynlong ruh ïa ki ban leit jurip bad ki la lap ruh ba don shibun ki bar jylal kiba ym don ki kot ki sla kiba biang bad kim shym la bud satia ïa ki kyndon da kaba ki kam ba ki dei ki nongshong shnong ka India ki lah ban wan trei ha kano kano ka bynta jong ka ri India.
Kine ki nontrei bar jylla ki la ïa lum ha katei ka Karkhana ban pynpaw ïa ka jingpyrshah halor ka jingkynnoh ba ki la shah shoh shah bom ha katei ka jingwan jurip ki kynhun ha ki Karkhana bad naduh ki Magistrate bad ki bor Pulit ki la hap ban wan mardor ban tehlakam ïa kane ka jingïakhih kine ki nongtrei bar jylla kiba la ïa pyrta bad pynrem jur ïa ka jingshah kynnoh ba ki la shah bom shah shoh khlem da don ki nongrim tang namar ba ki dei ki nongbylla ba na shabar ka jylla Meghalaya.
Dei halor kane ka jingïakhih kine ki nongtrei bar jylla ba ki nongïalam ka KSU ki la kynnoh ba ka dei ka jingkynshoit u trai ka Riangdo Veneers Private Limited ba bunsien uba la ju wan rah ïa ki nongtrei bar jylla khlem da bud ïa ki kyndon ain bad khlem da pyntip ïa ka bor shnong bad kum ka KSU ruh ka la pynrem jur bad ka pyrshah ia kane ka jingïakhih ki bar jylla ba ki la kam ba ha katei ka jingleit jurip ïa ki Karkhana kim shym la bom la shoh bad kane baroh ka jingpynpaw kitei ki nongtrei bar jylla ka dei tang ka jingkynnoh kaba khlem nongrim.
Da ki spah ngut ki nongïalam bad ki dkhot ka KSU ruh ki la hiar mynta ka sngi sha katei ka Karkhana da ka jingthmu ban pyni bor kylla ïa kitei ki nongtrei bar jylla bad ïa ki nongïalam bad ki dkhot ka KSU la pakhang lynti noh da ki Magistrate bad ki bor pulit khlem da ioh leit sha katei ka Karkhana lait noh tang katto katne ngut ki nongïalam ka KSU ba la ioh ban leit bad kiba la sakhi ba ki nongtrei bar jylla ki la thmu ban pyni bor bad ki la bat ruh ïa ki dieng bad ki nar rot ban ïa pyni bor halor kane ka jingjia.
Kumba la pynpaw da u wei na u nongtrei bar jylla, u Junmoni Baruah bad u Manager katei ka Karkhana, u S.K Banejee, la ong ba hynnin ka sngi shi kynhun ki samla ki la wan bann rung ha katei ka Karkhana ban tohkit ïa ki kot ki sla na ki nongtrei bylla bad khlem da burom ki la bom la shoh bad la don ruh kiba la mynsaw bad dei namar kane ka daw la pynlong ïa ki ba kin mih ban ïa khih paidbah ban dawa ïa ka la ka hok halor kane ka jingshah thombor ha kitei ki kynhun.
Ki la pynpaw ruh ba ngi dei na ka jylla Assam bad ngi dei ruh ki nongshong shnong ka ri India bad ngi don ka hok ban trei ban ktah ha kano kano ka bynta jong ka ri bad kane ka jingshah thombor ka la pynlong ïa ki ban bitar bad ban mih paidbah ban ïa khih na ka bynta ban dawa ïa la ka hok ba ka sorkar Meghalaya ka dei ban shim khia halor kane ka kam.
Ki la kynnoh ruh ha kane ka sngi ba la wan ban jurip da kitei ki kynhun la don lang ruh ki bor pulit, hynrei ki bor pulit kim shym la leh ei ei wat la ki la iohi ba kitei ki kynhun ki bom ki shoh ïa ki nongtrei bad kynthup ruh ïa u Manager katei ka Karkhana.
Namarkata, ki la pynpaw bad pynrem jur ruh ba lada ka sorkar Meghalaya kam leh ei ei kin mih noh baroh ki noingtrei bylla na kitei ki Karkhana ban leit phai noh sha ka jylla Assam bad ban pyrshah halor kane ka jingshah thombor ki la ong ruh ba kin ïalum ha Jorobat ban pyrshah ruh ïa ki Khasi kiba wan sha ka jylla Assam.
Haba pynshai pat na ka liang ka KSU Umïam Circle, halor kane ka jingïakhih ki nongtrei bar jylla ba ki la kam ba ki la shah bom shah shoh, u General Secretary ka KSU Umïam Circle Marcus Nongkhlaw u la pynshai ba ka KSU Umïam Circle ka la wan ban jurip hynnin ka sngi bad kum ki dkhot ka KSU kim shym la bom la shoh hynrei ki shu pan ïa ki kot ki slab a bun na ki nongtrei bar jylla kim don satia ïa ki kot ki sla khamatam ka labor license.
U la ong ruh baroh kine ki jingïakhih ki nongtrei bar jylla ka dei tang ka jingkynshoit u trai ka Riangdo Veneer Private Limited uba la ai bor ruh ban pynlong ïa katei ka jingïakhih hapoh katei ka Karkhana bad ka daw hi ka long ba katei ka Karkhanaa na ka por sha ka por ki ju wan rah tuh ïa ki nongtrei bar jylla khlem da tip ki tnad sorkar ba dei peit bad wat ka bor shnong bor thaw ruh bad tang ban tap eitmiaw ïa ki kam ba katei ka Karkhana ka ju leh bakla u la pynmih ïa kine ki kynrum ki kynram tang ban da rapjot ïa ka jingleh beain katei ka Karkahana.
Na ka liang u Organizing Secretary ka KSU, North Khasi Hills District Unit, u Samla Lester Nongbet u la ong ba ka KSU kan nym pdiang ïa kine ki kam pyni bor kitei ki nongtrei bar jylla bad khamtam ka jingkynshoit u trai katei ka Karkhanaa bad ka seng hi kan ieng ha ka nongrim ban nym ailad ba ki briew kiba nabar jylla ki shu wan trei ne bylla khlem da don ki kot ki sla kiba biang bad lada jia kano kano ka jingjia ba sngewsih kum ka kam pynïap briew, ka kam tuh ka kam lute mano ban shim ïa ka jingbah khlieh.
U la ong rub ba ka seng ym ba ka pyrshah ïa kinno kino ki briew kiba nabar ba kin wan bylla ha kane ka jylal, hynrei haba ki wan ki dei ban bud katkum ki kyndon bad khamtam ha kum kane ka pyrthei sniew bun ki jingjia ba sngiewsih ki jia bad lada wad ïa ki briew ba don kti ruh ym ju lap dien ba bun ki nongtrei bar jylla ki wan trei khlem da don ka jingtip da ka sorkar ne ki bor shnong.
Ban pyrshah halor kine ki kam pyni bor ki nongtrei bara jylla bad kumjuh rruh halor ka jingkynshoit u trai katei ka Kharkana, ka KSU ka la rai ban pynsangeh ban treikam katei ka Karkhana katba utei u trai ka Karkhana ym pat pan map na ka seng bad u la kynshoit pynban da kumne kumtei ban wan rah ka jingïapher jaid bynriew khlem da tip pat ïa ki kyndon ba u hap ban bud haba u pyntreikam ïa katei ka karkhana katkum ki kyndon ba la pyntreikam da ka sorkar hapoh ka Meghalaya, u la bynrap.
Na ka liang ka Dorbar Shnong Umïam, lyngba u Secretary Shnong, u Bah S. Marwein, u la ong ba ka Shnong Umïam ka ai ka jingkyrshan ïa ka kSU kaba la jurip ïa kine ki Karkhanaa bad ha ki snem ba la leit noh ki don ki jingshha pynïap briew, ka jingtuh bad ka jinglute bad wat ka jingshah thombor ki kynthei, hynrei jynjar ban lap ïa ki niongleh sniew bad ka daw hi ka long ba ka jingioh mon ki briew kiba nabar ban wan bylla ha kitei ki Karkhana.
U la ong ruh b akum ka bor shnong ka kyrpad ruh ïa ka tnad sorkar ba dei peit ïa kine ki kam ki dei ban pyrkhing katkum ki kyndon ain, namar lada ailad ban rung mon ki briew ba nabar ka jylal lada ki leh ïa kino kino ki kam sniew bad ha kaba khatduh ka jingkitkhlieh ka leit sha ka Shnong bad kane ka la ju jia na ka por sha ka por.
Na ka liang uwei u trai ka Karkhana ba don ha katei ka Industrial Estate, u Vishal Jain, haba kren ha bad ki nongtjhoh khubor, u la ong ba kane ka kynrum ka kyrnam ka mih, ka dei hi tang ka jingkynshoit u trai ka Raingdo Veneer Private Limited bad baroh shi katta kam ju don kano kano ka jingjia kaba ktah ïa ka imlang ka shalang, hynrei namar ka jingbym ïarei lang katei ka Karkhana ka la mih pynban kane ka huri hura hapoh katei ka Industrial Estate ha Umïam.
Haba kren halor kane ka jingjia bad ban tem ïa ka jingïakynad hapdeng ka KSU, kumba la dawa da ka KSU ha kaba khatduh ki bor synshar District bad ki bor Pulit haduh 6 Trok la pynphai lut noh ïa ki nongtrei bar jylla sha Assam tang ban tep ïa kane ka jingjia ban poi sha ka jingïasuk ïasain bad ban lait ban ktah ïa ka shongsuk shongsain ki paidbah.