Jowai, Risaw 25: Ka jingïalehkai phutbol haka kyrdan Super Division Football Tournament 2023 ba la ai kyrteng ‘U Kiang Nangbah Memorial Trophy 2023’ ïa kaba la pynïaid da ka West Jaiñtia District Sports Association, (WJDSA) Jowai hynne ka Sngi Balang ha madan Kiang Nangbah Stadium, Dongmihsngi Jowai.
Ha ka jingïakhun naka liang ka Sailung Ialong ka la khur ïa ka namjop hadien ba ka la pynliem da 2-0 kol ïa ka Mynthong.
Ka namtam ha kane ka jingïakhun ka long sha u Bachan Pale u ba la thep ïa baroh ar tylli ki kol ban pynthikna ïala ka kynhun ban khur ïa ka namjop, bad kine ki kol u la thep ha ka minit ba 51 nangta ka kol kaba ar shuwa ban kut ka por ha ka 90 minit.
La pyntip ba ka jingïakhun mynta ka sngi (26 tarik Risaw, 2023) kan long hapdeng ka Ladthadlaboh pyrshah ïa ka Nangbah Mulang haka por 2 baje nohphai sngi.
