Shillong, Risaw, 24: Ka Seng Kynthei jong ka Seng Khasi Kmie, ha ka Lah Sngi u Blei ka la pynkup burom ïa ki khun samla, kiba la pas bha shakhmat ha ki eksamin bapher bapher kiba la long mynta u snem ha ka jingïalang kaba la long ha Hall jong ka Seng Khasi Kmie, Mawkhar Shillong, ha kaba ki don 11 ngut ki samla shynrang bad kynthei kiba la ïoh ïa kane ka khusnam.
Nalor ka jingpynkup burom ïa ki samla kiba pas bha, ka Seng Kynthei, ka la pynkup burom ïa ka Kong Sweetymon Rynjah bad kumjuh ïa ka Kong Silbi Passah, kiba la don bynta ban noh synniang sha u sup u thiar jong ka thoh ka pule, ka rwai ka siaw, ka put ka tem.
Ha kane ka sngi, la sakhi lang da ka Kong Baïantimon Blah kum ka Kongsan, u Acting President bad u General Secretary ka Seng Khasi Kmie u Bah O. Pyngrope bad u Bah Hainess Marbaniang, ki dkhot jong ka Jylli Pyrkhat Kam Seng Khasi Kmie, ki dkhot jong ka Seng Kynthei, ki kmie ki kpa jong ki khynnah ba la ïoh ïa ka khusnam bad kiwei kiwei.
U Acting President jong ka SengKhasi Kmie u Bah O. Pyngrope u la pynpaw ka jingsngew kmen ban ïohi bad ïohsngew ba ki khun samla ka Seng ki la ïai bteng ban kiew shakhmat, ha kaba u la pynpaw ba ka burom ka leit ruh sha ki kmie ki kpa, ki bahaiing hasem kiba la lah ban ïalam bad btin lynti ïa la ki khun ki kti.
U la ong ba ki khun samla kiba la ïoh kat kane ka burom bad ka Seng Khasi Kmie ka kyntu ïa ki ban da pynlut ruh ïa ka por ba kordor jong ki ban pule ïa ki kot kiba thoh shaphang la ka jong, khnang ba lada ki leit ban pule shabar lada ki briew ki kwah ban tip shaphang ka Seng bad lada kum ki samla kim tip eiei ka wanrah ïa ka jingsngew biej ïa baroh.
Ha kane kajuh ka sngi, ka Seng Pyni Committee ka Seng Khasi Kmie, ka la sam ïa ki jingai sngewbha sha ki 12 ngut ki khun samla, ki longkmie kiba smat bad kiba ju poi tista bha ha manla ka Seng Pyni kaba juh pynlong ha iing Seng ha Mawkhar, Shillong manla ka sngi Robibar.
Kane ka jingai ïa ka jingai sngewbha ka long ban kyrsiew thiah ruh lem ïa kiwei pat ki parakur ki parakha khamtam ïa ki khun samla, ba kin wan tista sha ka seng pyni kaba juh long ha ka nohphai sngi jong ka sngi Robibar, kaba hangne lah ban ïoh ban lum ban lang ïa ki symboh ksiar ki symboh rupa, kiba long ha ka dur jong ki tien sneng ki tien kraw, ki khana niam, ka jinghikai ïa ka akor ka burom bad kumjuh ïa ka jinghikai na u riew tymmen u riew san.
