Nongstoiñ, Risaw 24: Ki Sengbhalang na West Khasi Hills, ba kynthup ïa ka HANM, WKSU, UHM,WYF bad MYF ki la pynpaw ïa ka jingbym sngew ïahap ban pynkut ïa ka tamasa phuh syntiew u dieng lane ka Cherry Blossom Festival ha ka sngi u Blei.
Haba kren sha ki lad pathai khubor ha ka sngi hat majai, ki nongïalam jong kine ki seng ki la pynrem ruh ïa ka jingkren u Myntri sorkar u bah Paul Lyngdoh, u ba la kren ha ki lad pathai khubor da kaba ong ba baroh ki sngi ki long kiba khuid. Ki la ong ba yn nym lah ban ïa nujor ïa ka jingkhuid ka sngi u Blei bad kiwei pat ki sngi, kata da kaba ki la pynshong nongrim na ka jingthoh ha ka kot bakhuid ne ka ktien ka jong u Blei.
U bah Wilstone Sohshang President ka HANM u la ong, “Kum ki khristan ngi kheiñ ba ka sngi u Blei ka long kaba khuid da kaba pynshong nongrim ruh na ka ktien ka jong u Blei. Ha kane ka sngi baroh ki ophis sorkar kim ju pynlong ophis ne treikam ha ka sngi u Blei. Ngi tikna ba wat ka secretariat ruh ka khang ha ka sngi u Blei namar ka dei ka sngi ka khuid ba kyrpang”.
“Hato ym long mo ban pynkut ïa kata ka tamasa ha kiwei kiwei ki sngi bad ngi don haduh 6 sngi, balei hap ban jied ïa ka sngi u Blei. Ka dei tang ka tamasa kaba lah ban pynkynrïah ym kum kiwei de ki kam kiba lehse ym lah kiar”, ong u bah Sohshang
Kum ki kynhun Seng na West Khasi Hills, ngi dawa na ka sorkar ba ka dei ban pynkynriah ïa ka jingpynkut ïa katei ka tamasa sha sha kawei pat. Ngi kyrshan ruh ïa kiwei ki kynhun bapher bapher kiba la mih shakhmat ban pyrshah ïa katei ka jingpynkut ïa katei ka tamasa ha ka sngi u Blei” u la ong.
