Nongpoh, Risaw 24: Kumba ki paid riewngeit Hindu ha Ri Bhoi District bad khamtam ha Nongpoh kaba dei ka Head Quarter jong ka District ha Ri Bhoi mynta u snem ki la rakhe shitrhem ïa ka jingleh ñiam Puja bad mynta ka sngi pat hadien ka lehñiam ka leh rukom katkum ka jingngeit Hindu ki la pynkut noh ïa kane ka lehñiam Puja da kaba ki la leit ban pynngam noh ïa ki blei ha ka wah Umtrew kaba don ha Byrnihat.
Shwa ban leit pyngnam ïa ki blei ha ka wah ha Byrnihat, ki paid riewngeit Hindu ki la pyndep shuwa ruh ïa la ñiam ka rukom bad ki la pynlong ruh ïa ka jingïaid paidbah da kaba pyni ïa ki dur jong ki blei ba ki la shna kyrpang ha ka surok bah jong ka National Highway-6 ha Ri Bhoi ban leit bret pat ïa ki Blei ha ka wah ha Byrnihat.
Ki paid riewngeit jong ki Hindu ba kynthup na ka Nongpoh Ram Mandir bad ka Maa Kali Mandir ki la shim bynta shitrhem ban pynkut noh ïa kane ka lehñiam Puja kum ka jingainguh ïa kita ki blei bad ban pan ruh kata ka jingkyrkhu kyrduh na kita ki blei ba ki bha kin miat bad ba ki dang roi dang par ha baroh ki liang.
Na ka liang kine ki ar tylli ki Mandir lyngba ka Puja Committee Celebration ki la shim bynta ban leit bret ne pynngmam ïa kita ki blei ha wah Byrnihat kaba dei ka sngi kaba ki la pynkut noh ïa kane ka lehñiam puja kaba dei kawei na ka jinglehñiam ba paw jong ka ñiam Hindu.
Haba kren halor kane jingleh ñiam Puja, ki nongïalam kitei ki Puja Committee ki la ai khublei kyrpang sha baroh ki paid Hindu kiba la wan ban shim bynta ha kane ka lehñiam puja bad ban pynlong ruh ïa kata ka lehniam puja kaba jop na ka bynta ban ai kata ka nguh ka dem ïa kita ki Blei ban ioh ïa kata ka jingkyrkhu.
Ki la ong ruh ba kane ka jingleh niam puja ka dei shi bynta ban pan kata ka jingkyrkhu na ki blei ba kita ki Blei kin ai ka jingkyrkhu ban wan kata ka shongsuk shongsaiñ bad ruh ba kin dang kiew irat ha baroh ki liang jong ka jingim.
Shuh shuh, ka la ai khublei kyrpang ruh ïa baroh ki paidbah ka Ri-Bhoi khlem da jer kyrteng bad khamtam ki bor synshar District kiba la ai ka jingkyrshan ban ïa trei lang.
