Nongstoiñ, Jymmang, 11: La bun bun snem ym shym la pynlong shuh ïa ka District Inter School Sport Meet ha West Khasi Hills bad mynta u snem ka District Sport Officer (DSO) ka Kong Balarina Syiem ka la pyrshang ban pynlong biang ïa katei ka lynpung ïalehkai na ka bynta jong ki khynnah kiba pule ha ki skul bapher bapher hapoh ka district.
Ïa katei ka lynpung ïalehkai la pynlong ha ka madan jong ka NDSA ha Nongpyndeng ha kaba ki don 12 tylli ki skul kiba la wan ban ïashim bynta.
Ka jingduna jong ki skul kiba wan iashim bynta ha katei ka lynpung imat ka dei namar ka jingbym ïoh ïa ka jingpyntip ha ka por kaba biang bad ruh na ka daw jong ka jingkhang khyrdep ha kine ki arsnem ba ladep ka rukom pynïaid ïa ki skul ka la dkoh haduh katta katta namar ki khynnah ki nonghikai kim don por shuh ban pynlong ïa ki sports ha ki skul jong ki namar ba bun bah ki lynnong ba ki khynnah skul ki hap ban pyndep ki la sahteng. Nalor kata ka por ba ki pynlong skul ruh kam pat da ïaid ryntih bha kumta wat ki nonghikai ruh ko shem jingeh haduh katta katta.
Ha katei ka sngi, shuwa ban sdang ïa katei ka lympung la pynlong ïa ka jingïalang ba lyngkot ha kaba la pynïaid da ka Kong Balarina Syem ha ryngkat ka jingïadon lang jong ki nonghikai na ki skul kiba la wan ban ïashim bynta, ki nongpynïaid ka NDSA ka kong L.Syiemlieh kaba dei ka Dsitrict School Education Officer (DSEO) kaba ka shah khot kum ka Kongsan.
Ha katei ka jingïalang, ka DSO ka la ai ruh ïa ka jingpynshai sha ki khynnah skul kiba ïashim bynta ha ki jingïalehkai bapher bapher.
Ka DSO haba pynshai ha ki khynnah skul ka la ong ba ki don bun jait ki jingïalehkai Sportsa ha la ki jong ki jong ki rukom kum ki Sports kiba pynproh ïa ka jabieng hynrei ki bym ktah pat ïa ka bor met hynrei ki sport kiba dei ki nongialehkai ki dei ki jingïalehkai kiba pynkhlaiñ ïa ka bor met bad kaba pynlong smat bad pynkhuid ïa ka jingmut jingpyrkhat jong ki khynnah.
Ha katei ka sngi shuwa ban sdang la ïoh ïa ka jingkren lyngkot na ka Kongsan kaba la pynher ïa ka lama bad ka la pynbna ba la plie ïa katei ka lympung ïalehkai.
