Plie u Chief Justice ïa ka Kashari District & Sessions ka WJH kaba heh 93,631 Sq.ft
![](https://mawphor.com/wp-content/uploads/2023/10/IMG20231019165628.jpg)
Jowai, Risaw 19: U Chief Justice ka Meghalaya High Court u Sanjib Banerjee mynta ka sngi ula wan ban plie ïa ka ïing Kashari ne ka District & Sessions Court West Jaiñtia Hills District kaba don ha Khliehtyrshi WJHD.
Ha kane ka sngi la wan ban donlang naduh u Symbud Myntri ka jylla ma Sniawbhalang Dhar, u Justice H.S. Thangkiew (Judge), u Justice W Diengdoh (Judge), u Justice B. Bhattacharjee Additional Judge, u Deputy Commissioner ka WJHD bah B.S. Sohliya, ki muktiar ka District, ki nongïalam shnong nalor kiwei kiwei de.
La ïoh ruh ban pynsngew shaphang ka District & Sessions Court WJHD da u N.A. Khan District & Session Judge haka jingkren pdiang sngewbha ïa ki nongwan sha kane ka sngi da kaba ong ïa ka West Jaiñtia Hills District Judiciary la pynïakhlad na ka Executive haka 27 tarik July, 2023 katkum ka Article 50 jong ka Constitution ka Ri.
Na ka bynta ka jingtei ïa kane ka Court Complex ka long ha ka jingheh kaba 11.162 acres, haka jingmang pisa kaba Rs. 35,89,82,000/- (Laiphew san klur Phra phew khyndai lak Phra phew ar hajar) tyngka bad kane ka ïing Building ka don ïa ka Ground Floor bad lai tylli ki mala ba shalor baroh ka Floor area ka long 93,631 Sq.ft (8698.60sq, metrs), ka don ruh haduh 7 tylli ki Court rooms.
Katba na ka liang u Chief Justice haba ai jingkren ula ong ka jingdon kum kane ka ïingkashari (Court) kan ïarap shibun eh ïa ki paidbah ban ïakhun ïa ki mukot duma jong ki, da kaba ong ba kane ka Court “ka ïeng na ka bynta ka hok jong ki”.
Ula pynsngew ba ka sorkar kala dep ban plie ïa u maw nongrim ban tei ïa ka National Law University, tang hapoh shiphew bnai ba la pass ïa ka aiñ bad kane ka long ka burom kaba khraw ïa ka jylla hi baroh kawei.
Ha ka liang ka jingkyrduh kam kyrduh jam jong ki khun samla mynta ki sngi ula kyntu ïa ki kynhun treimon sngewbha kum ki SHG ba kin mih shakhat ban seng ïa ki kam la jong namar kane ka lah ban plie lad plie lynti na ka bynta ka lawei jong ki.
U ma Sngawbhalang Dhar haka jingkren ula ong ka jingdon kane ka Court hapoh West Jaiñtia Hills kan ïarap ban wanrah ïa ka jingshynshar kaba khuid ba suba bad ula ong kane ka building ka dei kaba 9 hapoh ka jylla wat lada ka long ka jylla kaba rit ruh hynrei ka long pat kaba biang haka jingtei ïa ki ïing Kashari.
Shuh shuh ula ong ka jingkynrei ki kam sniew khamtam ka jingpyndonkam ïa u Drug da ki khun samla kala wanrah ïa ka jingeh kaba khraw eh haka imlang ka sahlang bad kum ki nongshong shnong kiba dei ban don ka jingkitkhleih ban rad diengkhong ïa kum kine ki kam sniew.
La pynphuh ïa kane ka sngi da ki jingrwai na ki khynnah kumjuh naka kynhun jong ka Jaiñtia Hills Bar Association bad ka jingshad tynrai ba la shim bynta da ki samla na Sabahmuswang, hadien jong kane ka prokram la khap ïa u ribbon jong katei ka District & Sessions Court WJHD da u Chief Justice ka Meghalaya High Court.