Shillong Risaw 19: U Myntri kam Jngohkai ka jylla Bah Paul Lyngdoh mynta ka sngi Palei, ula pyntip ba ki kam ki jam halor ka jingpyntrei ïa ka Ropeway ka la ïaid shaid shaid bad hapoh u Nohprah yn sa khot noh ïa ka Expression Of Interest (EOI).
“Ki kam ki jam ki la ïaid shakhmat bad ka jingeh kaba la mad khatduh eh ka dei na ka tnad Forest kaba la ai ïa ka jingbit mynta. Kaba sah mynta ka dei ka jingkhot noh ïa ka Expression Of Interest (EOI) ka ban leh ha u Nohprah” ong u Bah Paul.
Haba kylli hato kan don ka jingkiew ha ka jingbhah tyngka na ka bynta kane ka projek namar ba ka la don ka jingslem, u Myntri Sorkar ula ong ba ym ïohi satia ba kan don kum katei, hynrei lada ka don ruh ngin sa shimkhia.
Lah ban ong ba ka sorkar jylla ka la don ïa ka jingthmu ban sdang noh ïa ka Shillong Ropeway project ha ka jinglut jingsep kaba kot T. 140 Klur ka ban bei tyngka da ka Asian Development Bank.
Ka jingthmu ban buh ïa kane ka Ropeway ka long ban khring ïa ki nongwan jngohkai bad ka kam jngohkai kan kylla long kum ka lad ban aikam aijam ïa ki paidbah ka jylla.
