Bitar ki ASHA ba leit Delhi noh ka Dr. Ampareen shwa ban kynduh ïa ki

Shillong, Risaw 16 : Ki ASHA ha ka jylla ki la pynpaw ïa ka jingsngewsih bad ka jingbitar ha kajuh ka por da kaba kynnoh ba ka Myntri ka Koit ka Khiah, Kong Ampareen Lyngdoh ka la mih noh na Secretariat khlem da pyllait por ban kynduh ïa ki.
Haba kren bad ki lad pathai khubor, ki nongïalam ka Meghalaya ASHA Workers Union (MAWU) ba kynthup ïa ka President Kong Merijune Myrsing bad Adviser Kong Sony Kharjana ki la ïathuh ba ha ka jingïalang kaba dang shu dep shen la pynbeit ba kin kynduh biang ha kane ka sngi Nyngkong bad ka Myntri ban ïa kren halor kiba bun ki mat kiba ïadei bad ka bha ka miat jong ki ASHA.
“Ka long kaei kaei kaba sngewsih ba ynda ngi la poi, la pyntip ianga ba i Myntri im don bad haba ngi la phone ia i, i la pyntip ba namar ki kam ba kyrkieh i la hap ban leit jingleit sha Delhi. Te na ka liang ka MAWU ngi sngew ban ong ba i la dei ban pyntip ïangi shisngi arsngi shwa kane ka sngi ba im lah ban kynduh ïangi,” ong ka President haba kren bad ki lad pathai khubor.
Hynrei haba ïadei bad katei ka phang, na ka liang ka Myntri haba kren bad u Mawphor ka la pyntip ba na ka liang ki ASHA ki la dei ban pyntikna shwa shisngi arsngi ha shwa ba kin wan khnang ba kan ïoh ban pynbeit bad pyntip.
“Ki la dei ban pyntikna lane pynkynmaw ïanga ha shwa ba kin wan,” ong ka Myntri da kaba ïathuh ba hynne ka sngi hadien ba ka la dep bun tylli ki jingjurip bad kynduh ïa bun ki kynhun ka la leit sha Delhi na bynta ki jingdonkam ba kyrkieh.
Ka Myntri ka la ïathuh ruh ba ka la dep ban kynduh ïa ki la arsien halor ki kam kiba ïadei bad ki ASHA.
Shwa kane, kitei ki nongïalam jong ki ASHA ki la ong ba ki kwah ba ka sorkar kan ai jingshai bad ka jubab halor ki mat jingdawa ba kum ka kynhun ki buh kynthup naduh ka jingdawa ban kyntiew ia ka jingsiew na ka 2000 tyngka shi bnai ba ki ïoh baroh shi katta bad ruh na ka bynta ban ïoh ïa jingsumar ei na bynta jong ki haba ki pang ki shitom.
Haba bynrap lang, ka Adviser jong ka kynhun, Kong Sony Kharjana ka la ong ba kum ka Myntri ka la dei ban kren da kaba shai halor katei ka mat. Ka la ong ruh ba kum ka kynhun ki ai por shi taiew ia ka tnad ba kan ai jubab ïa kitei ki mat jingdawa.