Tura, Risaw 14: Kawei ka Shrieh Huleng ne Hoolock Gibbon, kaba dei ka mrad kaba don hapdeng ka jingma ban duhjait noh, ka la iap noh hadien ba ka la shah bat ha ka bording ilektrik ha ka thaiñ Gandrak Dare, Tura mynta ka sngi Saitjain.
La lap ba ka daw jong ka jingiap katei ka shrieh Huleng ka dei namar ka jingshah bat ha ki sainar ilektrik bad kane ka dei ka sien ka baar jongka jingiap kine ki mrad kiba la jan duhjait ha Tura ha kine ki 2 snem kiba la leit.
La ïathuh ba kane ka shrieh ka la hiar sha them jong ka Tura Peak hadien ba ka la dep ban shang ha kylleng lyngba ki dieng kiba don ha katei ka jaka kaba don hajan ka Kshaid Gandrak.
Ka jingiap kane ka shrieh ka dei na ka jingïoh bat ïa uwei u sainar ilektrik ha ka por ba ka dang shang ha katei ka jaka bad kane ka shrieh kaba la iap ka don ïa ka jingkhia kaba 6 Kg, la pyntip ki heh jong ka tnad Wildlife kiba la leit shim ïa katei ka shrieh kaba la iap.
Ki jingkynnoh kiba bun ki la mih pyrshah ïa ka MEPDCL ha kaba ïadei bad ka jingïaid ki sainar ilektrik hynrei ym shim la don ki ban shim khia.
La ïathuh ba bun ki la ujor pyrshah ïa ka Meghalaya Power distribution Corporation Limited bad MeECL kaba kynthup na ki nongshong shnong jongka Upper Chandmari bad na ka tnad Wildlife, kiba la pynpaw ïa ka jingma ïa ka rukom pynïaid ïa ki sainar ilektrik hynrei ki bor kiba dei khmih kila kyntait ban leh eiei ne ban pynbeit ia katei ka jingduna.
“Ngi la ujor ïa kitei ki sainar ilektrik bad ngi la kyrpad ïa ka MeECL la bunsien ban leh ïa kaba donkam namar ba ki hap ha ka lynti ba ïaid ki shrieh Huleng” la pyntip u Wildlife Divisional Forest Officer u Rupankar Marak.
