Tura, Risaw 10 : U MDC ba mynta ka GHADC ba mihkhmat ïa ka Zikzak, ula shah kynnoh ha ka kynhun Social Media ba kyrteng ka Civil Society A’chik Welfare Organisation, ba ula ieh shiteng ïa ka project shna surok ba la bei tyngka da ka Sorkar Pdeng ka PMGSY skhim, kaba la wanrah ha ka jingsohsat ïa ki paidbah ka South Garo Hills.
Une u MDC u dei u Akthar Ali (MDC shimet), uba la ïoh ïa ka project shna surok jong ka skhim PMGSY na Hulukona sha Gopinathkilla, kaba jngai kumba 4 Km eiei. Une u MDC ula ïoh ïa kane ka kam saw snem mynshuwa.
Ka signboard jong ka PMGSY ka la pyni shai ïa ki jingkheiñ jingdiah jong ka project bad ka kyrteng u contractor hynrei ka surok pat ka dei ka bym i long ban peit, kaba bun da ki thliew ki syar ba la dap da ka umslap.
Ka CSAWA kaba dei na Ampati ka la kynnoh ba une u MDC ula shu ieh shiteng por ïa kane ka project kaba dei ban pynïasoh ïa bun tylli ki shnong kiba don marjan ka khappud bad ka Bangladesh.
Ka kynhun ka la rai ban pan jingtip noh da ka RTI ban lap ba haduh katno la pyntrei ïa kane ka project bad katno la pyllait ïa ka pisa ne la sei da une u contractor uba la kylla long u riew saiñpyrthei.
U President ka CSAWA Tryans ChM arak ula ong ba ki Khynnah ba leit skul na ki shnong ba ïaid lyngba kane ka surok, ki shaniah ha kane ka surok ha ka leit ka wan bad kumjuh ruh ki nongshong shnong kiba leit ïew leit hat.
U ong ba ka jingpan jingtip lyngba ka RTI kan pynpeit mat ïa ka Tnad ba kan pynthikna ba ki project ki dei ban long kiba la trei pyndep.
