Nongstoiñ, Jymmang 10: U Bah Gigur Myrthong MLA ka Mawshynrut Constituency ha ka sngi Hatmajai jong ka taiew, u la plie paidbah ïa ka ïing skul ba thymmai jong ka St. Thomas Secondary School Nongjri kaba hap hapoh Mawshynrut Civil Sub Division, ka skum kaba u la pynïoh jingïarap lyngba ka NEC scheme ha ka mang tyngka kaba T.50,00000/- (San phew lak).
Haba kren ha ka jingïalang plie, u Bah Gigur Myrthong u la ong ba ha ki saw snem jong ka jingïaid lynti, u la pyrshang katba lah la ka buit ka bor ban wanrah ki kam pynroi ha ka dong ka thaiñ. U la ong ba kum u nongmihkhmat u ïohi ïa ka jingbym biang ki jaka pule puthi ha ka dong ka thaiñ. Kumta u buh ïa ka pule puthi hakhmat eh namar u tip ba ka pule puthi ka dei ka lawei na ka bynta ki khun ki kti.
U la ïathuh ba ha kine ki khyndiat snem u la dep ban pynïoh 3 klur ka scheme na ka NEC, na ka bynta ban pynbha ïa ki jaka pule ha ka dong ka thaiñ bad mynta ruh u dang shu ïoh biang sa san klur bad ïa kane ruh un ïarap na ka bynta ban pynbha ïa ki jaka pule bad kiwei kiwei ki jingdonkam.
U la ong ba ha u 2018 ki paidbah ki la jied ïa u ban long kum u kpa jong ka Constituency, kumta ka dei ka kamram jong u kpa ba peit ïa ka jingeh jong ki khun. U la pynpaw ruh halor ka jingeh ba ki paidbah ki la ïakynduh ha kine ki snem ba la dep namar ka jingbym don ka surok ba biang.
Hynrei, u la ong pat ba ka thaiñ ka la long kaba donbok ba tang hadien katto katne ba u la shah jied kum u nongmihkhmat, u la lah ban pynïoh ïa ka scheme ha kaba kane ka surok mynta ka la long kaba bha bad ka la pynsuk ïa ki paidbah ha ka ïaid ban ieng bad ka kit ka bah.
Ha kane ka sngi la ïadonlang ruh u Fr. Stephen Lamin, Parish Priest ka Nongjri Parish, I Sr. Brigit, Headmistress ka St.Thomas Secondary School, Nongjri, ki nonghikai, ki khynnah skul, ki kmie ki kpa bad kiwei kiwei.
