Da u ‘nembah khyrwit kylla ka DC ïa u Bah Lambor khang syndon ban tih maw bad shyiap

Shillong, Jymmang 9 : Hadien ba u MLA ka Nongkrem u bah Lambor Malngiang u la kob na rynsan ha ka jingïalang paidbah ba dang shen ha Lad Nongkrem ba un khyrwit na shympriahti da u tyrnem ïa kino kino ki ophisar kiba wan khang ïa ka jingtih maw bad shyiap, mynta daiñ da u nembah syndon kyrwit kylla ka Deputy Commissioner (DC) I kong Isawanda Laloo IAS ïa ka jingkob utei u MLA da kaba pynjari syndon da ka kyndon aiñ 144 CrPC ban khang ia ka jingtih maw bad shyiap ha baroh kawei ka East Khasi Hills District khlem da ïoh ïa ki Licence ban tih maw bad shyiap.
Kat kum kane ka hukum la khang ban tih maw na sharing lum bad khat ne tong shyiap na trai ki wah khlem da ïoh jingbit ne ïoh Licence ban leh ïa katei ka kam ne khlem da ïoh jingbit na ki bor ba dei peit. La pynjari ïa kane ka hukum hadien ba ka DC ka la ïoh jingtip ba kane ka jingtih mar beaiñ bad khat ne tong syiap na trai ki wah ka dang ïai bteng beit ha kane ka District.
Wat ka ïing bishar National Green Tribunal (NGT) ruh ka la khang ïa u briew ne ki kompani ne kino kino ki kynhun ban tih maw bad shyiap beaiñ na ki wah la ka long ha kano kano ka jaka jongka ri khlem da ïoh jingbit, licence ne clearance certificate na ki bor ba dei peit kat kum ka EIA Notification 2006 of MoEF & CC Government of India.
La pynpaw ba lada ïai bteng ïa kane ka kam tang shu slap ïa u maw bad shyiap la kit lut shapoh wah nalor ki sharing lum bad kane kan wanrah ka jingjulor kaba jur ïaka mariang bad pyniap ruh ïa ki doh um.
Nalor kata kane ka jingtih maw bad shyiap ka la wanrah ka jingjngut bad jingsaw ka um kat haduh ba ki jingthaw ba im hapoh um kim lah shuh ban im bad wat ban dih ïa ka um ruh ym long shuh. Kumta ka DC kam banse ban pynjari noh da kane ka kyndon aiñ ha baroh kawei ka district ban ïada ïa ka jingim briew, mrad, jingkoit jingkhiah bad ïa ka mariang. Kane ka jingpynjari ïa kane ka kyndon aiñ 144 CrPC kan treikam tad haduh ban da pynbna da kumwei pat.