Shillong, Nailur 29: Ka Seng Voice of the People Party (VPP) ka la wer ïa ki paid Khristan ha ka jylla ba ki dei ban ‘boycott’ ïa ka jingpynlong pynkhuid shnong ka sorkar ha ka 1 tarik u Risaw kaba dei ka Sngi U Blei.
Ka kyrwoh ba la phah da u General Secretary jong ka Party, u Dr. Ricky AJ Syngkon, ka ong ba kane ka jingpynlong ka sorkar ban pynkhuid shnong ha ka Sngi U Blei, kadei ka jingñiuh roit ïa ka jingngeit bad ka hok ki Khristan. U la ong ruh ba ka jingpynkhuid shnong borabor la ju leh ha ka 2 tarik u Risaw, kaba dei ka Sngi kha u Mahatma Gandhi. “Balei ka sorkar kam pynlong beit ha ka 2 tarik, kabym dei ka Sngi U Blei”, la ong u Dr. Ricky.
Kumta u wer ïa ki paid riewngeit Khristan ban kyntait war ïa kane ka jingkhot ka sorkar ban pynkhuid shnong ha ka Sngi U Blei, hynrei ban pynkhuid beit ha ka 2 tarik.
Kane ka jingwer ka Seng VPP ka long hadien ba ka ophis jong u DC West Khasi ka la pynbna ban pynlong ïa ka jingpynkhuis ïa ka wah Nonbah bad ka ïew Nongstoiñ ha ka 1 tarik u Risaw kaba dei ka Sngi U Blei, naduh ka por 10 haduh ka por 11 baje mynstep, da kaba bthah ruh ïa ki ophis sorkar bapher bapher ban phah mar shiphew shiphew ngut ki nongtrei bad kumjuh ruh ki riew paidbah ban wan ïashim bynta.
Ha shuwa jong kane ka Seng HYC West Khasi bad ka FKJGP West Khasi ruh ki la pynpaw ka jingpyrshah ïa kane ka jingkhot u DC.
