Saw sngi lynter pynlut por ki paitbah ban maramot dalade ïa ka surok na Mawdet sha Mainop

Nongstoiñ, Nailur 29: Na Mawdet haduh shnong Mainop, ka jingjngai ka long tang kumba saw kilomitar tam bad haduh mynta mynne ki paidbah nongshong shnong, ki dang pyndonkam da ka surok ba la shna da ki nongkhaïi dieng ha ki snem ba mynshuwa, ha kaba ki paitbah jong ki shnong kiba don ha katei ka thaiñ ki pyndonkam ha kaba kit ïa ki marbam, ki tiar ki tar bad haba ki leit jingleit.
Wat la katei ka surok ka dei tang ka surok ki dieng ruh, ki paitbah ki hap ban maramot man la u snem namar ki shem jingeh ha kaba leit jignleit bad ki ïa ki tiar ki tar. Kumta na ka liang ki paitbah jong katei ka thaiñ jingsngew khia man la u snem ki la pynlut por ban moramot ïa katei ka.
U bah Teibor L.Peiñlang haba ïakren bad u nongthoh khubor, u la ong ba dang ha ka taïew ba la dep ki la pynlut por haduh ar ngi ban maramot ïa ka surok bad ha kane ka taïew ki la pynlut biang sa ar sngi, hynrei ym pat lah ban pyndep bad kai bynta ba dang donkam ban trei ki dang bun bha. U la ong ruh ba ki don ki jaka ba lada thep maw shispah trok ruh ym pat dap hynrei ki paitbah ki hap ban thep maw tang ha ki bynta ba ïaid ki taïar jong ki Mahindra pickup bad ki Sumo.
Nalor kata ki paitbah ki la ong ba ha kitei ki ar sngi ba ki la dep trei, kim shym lah ban pyndep na ka daw jong ka jingbym lah pynbiang ïa ki maw ban thep ha ki thliew ki syar, lem bad ki jaka kiba la ktieh palat bad ha kane ka sien ba mynta ruh. Namar ka jing pynthut u slap kim shym la lah ban pyndep haduh ban da poi sha ka shnong Mainop.
Nalor kata ki la ong ruh ba ha kitei ki ar sngi ki la pynlut ruh da ka pisa ban phah kit maw ha ki Mahindra pickup, nangta hynne ka sngi ruh ki hap ban pynlut pisa biang bad ha kine ki taïew ban wan kin sa mih paitbah biang, ban maramot ïa katei ka surok tang ban lait ki kali kiba kit ïa ki mar bam bad ki tiar ki tar ba donkam.
Kitei ki rangbah ki la ong ruh ba namar ka jingjynjar ha ka leit ka wan, lada ym lah ban pyndep kin sa shong pyrkhat biang kumno kin leh. Namar ha kine ki taïew ban wan u slap u la kham duna bad ki la ong ruh ba lada kin mih biang ban maramot ïa katei ka surok, ki paitbah jong saw tylli ki shnong ha katei ka thaiñ ki dei ban ïamih ryntih. Nangta kin pyrshang ruh katba lah ban wad ïa ki jaka ba ïoh pahuh ki maw, na ka bynta ban thep ha ki thliew jong ka surok tang ban lah ïaid da ki Mahindra pickup bad ki jeep.
Ki la ong ruh ba ki don katto katne ki bynta ba ki surok ba la pyntrei na ka skhim shispah sngi, hynrei namar ka jingbym pat siang maw, ka um slap ka khlong lut ïa ka khyndew bad shilynter ka surok ka don tang ki thliew suda. Ha ka por lyiur haba ki longkmie ki leit jingleit da ki Mahindra pickup ha ki jaka ba ki sahkut, kim banse ban hiar bad khynñiat lem ïa ka kali bad ki rangbah tang ban lait na ka jingsahkut.