Haduh 200 klur yn theh ka sorkar pdeng sha KHADC ban leh ïa ki kam pynroi

Shillong, Nailur 27 : Ka sorkar pdeng kan theh kumba 200 klur tyngka sha ka Khasi Hills Autonomous District Council (KHADC) na ka bynta ban leh ïa ki kam pynroi la ka long ha ka khuid ka suba bad ruh ha ka umbam umdih.
Haba pyntip ïa kane ha ki lad pathai khubor, u CEM ka KHADC, Bah Pynïaid Sing Syiem u la ong ruh ba katei ka 200 klur ka kynthup ïa ka Tied bad ka United Grant lyngba ka Fifteen Finance Commission jong.
“La kumno kumno shwa ka lehniam Puja ngi khmih lynti ba ngin ïoh noh ïa katei ka pisa,” u la ong.
Katkum ka jingïathuh da u CEM, lyngba ka tied Grant kaba long jan mar shiteng na katei ka bhah, ka Council ka hap ban ai jingtyrwa ban trei na ka bynta ban pynbiang ïa ki umbam umdih, ka khuid ka suba, ka koit ka khiah bad kiwei kiwei. U la ong ruh ba ha katei ka thup, la khang ruh ban tei ïa ki jingtei.
Haba ïadei pat bad ka Untied Grant, u la pyntip ba kam don jingkhang satia ban trei ïa kino kino, kumta lah ban shna ïa ki ophis jong ki Dorbar Shnong, ki iing skul, ki ïew jong ka council bad kiwei kiwei.
Shuh shuh u la ïathuh ba ka Council ka don ka jingthmu ruh ban shna noh da ka Tradition Music Institute, kaban ai jinghikai ïa ki samla donsap ban pyntbit la ka long ha ka kam tem, rwai, shad tynrai.
Shwa kane, u CEM u la ïathuh ba ka sien kaba khatduh ba ki ïoh ïa katei ka song pisa na ka sorkar pdeng kadei naduh u snem 2020-21 kaba mut lai snem mynshwa.
Haba batai bniah, u la ïathuh ba ka EC ba thymmai mar ïa shimti ki la lum lut ïa ki ophisar ban buddien ïa ka rukom treikam bad mardor hi ki la ïoh ban pyntyllun stet ïa ka kam ban ïohsngew ïa ka jingeh ba ki ophisar ki kynduh ha ka jingtreikam.
“Ha kaba nyngkong ngi la syier ïoh ym lah ban siew tulop ïa ki nongtrei ha u bnai ban wan hynrei da ka jingtrei shitom ka EC ba thymmai mynta ki nongtrei ka Council kim don shuh ka jingsyier ha kaba ïadei bad ka tulop,” u la ong.
Nalorkata u la ïathuh ruh ba kaei ka kam kaba ka EC barim ka leh ha ki lai snem kane ka EC ba thymmai ka la lah ban leh ha ki lai bnai.
“Mynta ka sorkar jylla ka la pyllait ïa ka khajna kaba 10 klur lyngba ki khajna marpoh khyndew bad hynin ka sngi ka pyllait sa 4klur tyngka bad shen ka la pyntip ba kin sa pyllait sa 30 klur,” la bynrap shuh shuh u CEM.