Nongpoh, Jymmang 09: Namar ka jingud jingnam jong ki paidbah jong kiba bun tylli ki shnong kiba ïaid lyngba u surok naduh Liarbang sha Mawlasnai ter ter, ki nongïalam ka RBYF Raid Nongtung Circle mynta ka sngi kila mih ban maramot ïa katei ka surok namar ka jingiehnoh beiñ jong ka sorkar bad ka tnad PWD.
Ka seng hapoh ka jingïalam jong u Samla Finest Rymbai President bad ki dkhot ka Raid Nongtung Circle bad kumjuh ruh ka Eastern Zone kila theh pyndap ruh da ka khyndew ïaki jaka ba sniew palat kaba wat ki kali kila shem jingeh ban ïaid khamtam mynta ba dei ka aiom slap da ka kor JCB.
Naka liang kitei ki nongïalam ka RBYF Raid Nongtung kila ong ba ka jingmih paidbah jong ki ban maramot ïa katei ka surok ba jot rathai bad dap da ki thliew ki syar ha shilynter jong ka surok, ka dei namar ka jingud jingnam jong ki paidbah jong ki phew tylli ki shnong jong ka Raid Nongtung kiba ju pyndonkam man ka sngi haka leit ka wan, namar ka jingiehnoh beiñ ka sorkar mynta la bun bun snem khlem don kano kano ka jingmaramot lane ban pynbha ban pynsuk ïaki paidbah haka leit ka wan bad ka kit ka bah. “Kane ka dei ka sienjam ba kum ki samla ba kitkhlieh ïaka jingeh ki paidbah kila mih ban pynbha bad maramot ïa katei ka surok, namar ka jingjynjar bad syrtok jong ki paidbah haka leit ka wan khamtam haka pang ka shitom bad ki samla pule kiba beh sha ki jaka pule man ka sngi ban ïaid lyngba katei ka surok” la ong kitei ki nongïalam
Kila ong ruh ba kane ka surok kam dei satia tang ba ki paidbah ki pyndonkam ha ka leit ka wan bad ka kit ka bah ïa ki mar rep bad lyngba kane ka surok ki khynnah skul ki pyndonkam ban leit sha ki skul pule bad kumjuh ruh kiba pang ba shitom khamtam ki Longkmie kiba armet ka la buh jingeh shisha lada don kiba pun ba kha bad teng teng la hap ban kha tang ha shiteng lynti na ka jingsniew ka surok kaba la shim por da ki kynta ha ka jaka ban poi tang da ki minit kaba lah ruh ban wanrah ka jingjia ba sngewsih.
