Pakhang surok ki rawon ha Pamphyrnai, khlad i khunlung ba dang shu kha hapoh kali, shitom jur ka kmie ha Hospital

Nongstoiñ, Nailur, 17: Ka jingïakop khwai dohkha ha pung Pamphyrnai West Khasi Hills, ka la wanrah pynban ïa ka khubor ba sngewsih, ha kaba tang na ka daw ka jingsahkut jong ka kali bad khlem poi jaka sumar ha ka por kaba biang, kawei ka longkmie ba dang armet ka la hap ban kha ïa i khun hapoh ka kali bad tang hadien katto katne por i khunlung i la khlad noh na kane ka sla pyrthei.
Kane ka la jia ha ka sngi Saitjaiñ ha Pamphyrnai ha kaba ki rawon na kylleng ki jaka ki la tuid sha ka jaka ïakop khwai. La ong hadien ba la pynbna ïa ka tiket jong ka khalai nusip bad ïoh kali (lucky draw) ha ka por 2:00 baje eiei nohphaisngi ha shilynter jong ka surok bah National Highway kaba don harud jong katei ka pung, ka surok ka la shlei smam da ki paidbah bad ki rawon kiba la ïa mih sha surok bad kane ka la wanrah ïa ka jingsahkut kali kaba la neh palat bun kynta haduh da kem iong reiñ syndon ka suiñ bneng.
Ka jingsahkut ki kali kiba ïaid ba ieng lyngba kane ka surok, ka la pynbitar ïa ki nongleit nongwan kiba la sahkut da ki bun kynta hapdeng surok. La ong ruh ba ka jingsahkut ki kali ka dei ruh namar ka jingshlei da ki kali ha baroh arliang jong ka surok. Kumta ki kali kiba mih bad ba hiar na Nongstoiñ ki la sahkut lut. Kine ki kali kim dei tang jong ki riew shimet ne kali kamai, hynrei kynthup lang ïa baroh naduh ki kali Pulit, kali jong ki heh Sorkar khamtam ki kali kit nongpang.
Kaba kham sngewsih eh kaba la jia ha ka sngi Saitjaiñ ka long ïa ka jingjia ïa ka longkmie ba armet lem bad ki bahaïing kiba don ha ka kali Tourist rong lieh ba thmu ban leit sha jaka sumar. Hynrei naduh Nongspung katei ka kali ka la shu ieng sah, ha kaba ka la pynlong ïa ki ar ngut ki rangbah kiba don hapoh kali ban ïakren ïa ki rawon ban pyllait lem hynrei ki la shah kren heh pynban.
Kumta, kim banse ban hap ïaid kjat naduh Nongspung bad leit ïakren ïa ki Pulit kiba don ha Pamphyrnai ban ïarap pyllait ïa ka kali ban poi sha jaka sumar. La ong ba dei ha ka shnong Khyllem Tiehsaw ba ka longkmie ka la kha ïa i khun shynrang bad tang hadien katto katne por i khunlung i la khlad noh. Katba ïalade pat ka don mynta ha ka jingshitom bad shah sumar ha Holy Cross Hospital, Mairang.
Lah ban kdew hangne ba kane ka jingsahkut kali ha surokbah National Highway marjan bad ka pung Pamphyrnai kam dei shuh ka sien kaba nyngkong, hynrei manla ka por ba don ka jingpynïakop khwai. Hynrei, ha ka sngi saitjaiñ ka jingbun briew bad ki kali ka la long ar shah bad lai shah ïa kaei kaba ju long baroh shikatta. Dei na kata ka daw ka jingsahkut ka leit ka wan ka la long kaba jur bha bad ka la neh ruh da ki bun bun kynta haduh da dum syndon ka suiñ bneng.
Ym tang ha Pamphyrnai, hynrei man ki jaka hi jong kane ka surokbah National Highway Shillong-Nongstoiñ, katba don ki jingïakop khwai dohkha kum ha ki thaiñ Kynshi ter ter, ka jingsahkut kali ka neh da ki bun bun kynta. Kane ka ong kaei kaei ka bym lah satia ban pdiang, namar ka ktah ïa ka leit ka wan ki paidbah khamtam kiba pang ba shitom.
Ka jingkylli ka long hato ki bor District, bor Hima bad ki bor shnong kin shah kin ailad ïa kum kane ka jingpynthut ïa ka ïaid ka ieng ki paidbah, tang na ka bynta ka kamai spah ki nongpynïaid bad ka tamasa jong ki rawon? Balei lada ïa kwah ïakop khwai palat ba kim shu ïa leit sha pynlong sha ki jaka kyndong lane sha wah. Balei ban pynthut bda ban pyndik ïa ki paidbah nongleit nongwan bad ïa kiba kyrkieh kam khamtam ïa kiba pang ba shitom ha surok bah?