Kyrshan pura ka EJHTO ïa ka SWSEJHD bad KSU ba buh por ban maramot ïa ka surok NH-6

Khliehriat nailur 14: Ka East Jaiñtia Hills Truck Owner & Transporter Association (EJHTO&TA), lyngba u kyrwoh ba la phah da u President, u bah Kyrshan Dkhar, ka seng ka ai ïa ka jingkyrshan kaba pura ïa ka Synjuk Waheh Shnong East Jaiñtia Hills District kumjuh ruh ïa ka Khasi Students’ Union-Narpuh Circle bad ruh ïa ka Jaiñtia Students’ Movement –Eastern Region halor ka jingaipor (Deadline) jong ki ïa ka sorkar ba kan maramot noh mardorw ï ka surok National Highway-6, ka ba la sniew shisha mynta shaba palat u pud.
“Kane ka surok NH-6 ka long kum u thied snam ba radbah ym tang ïa ka jylla Meghalaya, hynrei jong kiwei pat ki jylla ha thaiñ shatei lam-mihngi jong ka Ri India ruh, Ka jingsniew palat jong kane u surok ym tang ba ka la ktah ïa ki paidbah nongleit nongwan, hynrei ka la buh ruh ha ka jingma kaba khraw bha ïa ki kali motor bad khamtam eh ka buh jingma ïa ki mynsiem briew ba kordor, kiba dei ïaid lyngba na kane ka surok”, ong u kyrwoh.
“ ka nam te, National Highway, tangba ka kam pat tang kum ka surok pohshnong ruh ym i dei shuh, ki paidbah ki la sah ha ka jingdum namar ngim tip doh aiu sha lyndet, kat haduh ba ki bor sorkar ba dei peit ïa kane ka surok ki la shu iehnoh beiñ shisha haduh katne katne, i kumba ki paidbah ba don kali ki khlem siew ïa ki khajna surok, kat haduh ba ki kali naduh kiba heh haduh kali rit bapli kim long shuh ban iaid lynti lyngba kane ka surok”
“Ki paidbah baroh mynta ki la bitar jur bha halor ka jinglong jingman jong une u surok NH-6. Kumta na ka bynta ka bha ka miat jong u paidbah, ha ka jingiadei bad ka jingsniew palat ka surok, ka EJHTO&TA, ka dawa na ki bor ba dei peit naduh ka sorkar jylla haduh ka sorkar pdeng ba ki dei ban maramot noh wut wut ïa kane ka surok bad ha ka jingiadei bad kane, ka seng, EJHTO&TA, ka ai ïa ka jingkyrshan kaba pura ruh ïa ka SWS East Jaiñtia Hills District, ïa ka KSU Narpuh Circle bad ruh ïa ka JSM Eastern Region ki seng kiba la iaid lypa shakhmat ban ai por (Dealine) ïa ki bor ba dei peit ban maramot noh wut wut ïankane ka surok” la pynkut u kyrwoh na ka EJHTO&TA.