Ym shah shuh ban teh ïa ki syiar na ryndang, na kjat, na thapniang ne rah khongpong

By Mawphor News Desk On Sep 15, 2023

Shillong, Nailur, 14: Da kaba pyntreikam ïa ka Rules 16,17 jong ka Prevention of Cruelty to Animals (Regulation of Livestock Markets) Rules 2017 bad ka Rules 77, 80, 83 bad 84 jong ka Transport of Animals (Amendment) Rules, 2001, ka Deputy Commissioner jong ka East Khasi Hills District ka la pynmih ïa ka jingbthah ban ym shah shuh ïa ki briew ba kin patan ïa ki syiar ha madan ne patan na ka khlieh bad na ki thapniang haba thmu ban pynïap na ka bynta ban bam doh.
Yn ym shah shuh ban teh ïa ki syiar na ryndang, na ki kjat lane ki thapniang ne ban rah da khongpong.
La bthah ruh ba ki sem bad ki ruh thep syiar dei ban shna da kiba ailad ïa ki syiar ba kin ïoh ban ieng, ban dem ha madan, ban pyiar ïa ki sner bad ban phai shadien ne shakhmat katkum ka jingsngewbit jong ki. Dei ban kiar katba lah ban shu thynñiang ïa ki syiar ha kawei ka sem ne ka ruh syiar.
Dei ban shna ïa ka jingkhang kaba kham heh ban ailad ïa ki syiar ba kin rung ne mih, ka sem ne ka ruh kam dei ban long kaba khim, kaba lah ban pynmynsaw, ne ka pynjynjar ïa ki syiar. Dei ban ai bam bad kham bun ka um haba donkam. Ki sem syiar ki dei ban don ïa ki jingshai kiba biang, ka pongshai bad ka jingïada na u slap, ka jingkhluit bad ka lyer khriat.
Haba kit ïa ki syiar ha ki kali, dei ban pynthikna ba ki syiar ki dei ban long kiba koit ba khiah. Ki ruh thep syiar haba kit da ki kali ki dei ban long kiba khuid bad kiba la synreit dawai shwa ban thep ïa ki syiar.
Ki ruh thep syiar ki dei ban long kiba kylluid bad kiba biang ka pongshai.
Ïa ki syiar dei ban pynbiang bad ki jingbam bad ka um shwa ban thep ïa ki ha ki ruh syiar na ka bynta ban pynkit sha kiwei ki jaka bad ban sa khyndit ka bam bad ka um.
Dei ban pynthikna ruh ba ïa ki syiar dei ban da set bha khnang ba kin lait na ka jingshah tuh.
Ïa ki syiar ba la pynkit na kawei ka jaka sha kawei dei ban tah bad ka jingthoh, “Care in Transit.”
La bthah ruh ba ïa ki kali kiba kit ïa ki syiar dei ban bud pyrkhing ïa ki kyndon jong ka Transport of Animals Rules 1978 bad ka Transport of Animals (Amendment) Rules, 2001 bad 2009 khnang ban ïada na ka jingleñbein bad ka jingjynjar jong ki syiar.