Pynkhreh ka RBP HSS ban tei ïa ka building Higher Secondary ban nang pynïar ïa ka shlem bad tnad pule

Nongpoh, Nailur 15: Ka skul Ri-Bhoi Presbyterian Higher Secondary School Nongpoh kawei naki skul kaba la rim kaba la sdang naduh u snem 1967 kum kawei naki shlem hikai ban pynphriang ïaka jingnang jingstad bad ruh kaba la paw haka thaiñ Ri-Bhoi bad pynmih shibun ki khraw pyrkhat, mynta ka kynti kala pynkhreh pat ban tei sa ïaka building jong ka Higher Secondary namar nalor ka Arts Stream kaba la don lypa naka liang ki bor pynïaid skul kila pynkhreh ruh ban buh sa ka Commerce bad Science Stream ban pynïar shuh shuh ïa katei ka shlem pule.
Naka liang u Ma Vincent H Pala MP ka Lok Sabha u la wan ban shim bynta kum u kongsan ban buh ïa u mawnongrim haka jingdonlang u Bah Mayral Born Syiem MLA ka Nongpoh, ka kong Paidolyne L Nonglait DSEO, Rev DS Roy Muktieh Executive Secretary I/C CED, RBP Synod, Rev HL Myrsing President ka Managing Committee, Rev KP Masharing Executive Secreatary ka RBP Synod, Bah W Radu Principal bad kiwei kiwei ki riew rangbah ryngkat ki kmie ki kpa, ki nonghikai lem bad ki khynnah pule jong katei ka skul.
Kat kum ka jingpynkhreh jong ka skul ka jinglut ban tei ïa katei ka ïing building ba thymmai ka long T.4, 64, 71000/- ba kum ki bor pynïaid skul kila pynpaw ruh ba ka dei ka jingkit kaba khia bad kyrpad ruh ïa kitei ki nongïalam naduh u Ma Vincent H Pala, Bah Mayral Born Syiem ba kin phai khmat lem ban pynmang skhim kum ka jingïarap ba katei ka jingthmu bad ka jing angnud kan urlong noh shen.
Haba kren ha katei ka sngi naka liang u Ma Vincent H Pala u la pynpaw ka jingsngew kmen ban iohi ba katei ka skul kala nang roi katba nangmih ki sngi bad kane ka dei ka khubor kaba bha sha ki samla pule ka thaiñ bad kumjuh ruh ki kmie ki kpa kiba phah skul ïala ki jong ki khun.
U la ong ruh ba ka jingnang jingstad ka dei ka atiar kaba khlaiñ bor ha kane ka juk kaba mynta bad ban kyntiew ïaka pule ka puthi donkam ïaki nongïalam kiba stad bad ka sorkar kaba phai khmat ban thaw ïaki policy bapher bapher bad ban pyntreikam ïaki haka rukom kaba dei bad kyntu ruh ïaki khynnah skul ha katei ka sngi ba ki dei ban minot thop haki jingpule jong ki khnang ba kin poi sha ka thong kumba ki angnud.