Katto nga tangon kum u MLA Liang Pyrshah hynrei kim ju pynbud: Bah HM Shangpliang

Shillong, Nailur 12 : Da ki spah bad ki hajar ngut ki nongïalam bad ki nongkyrshan ba radbah jong ka BJP hapoh ka jingïalam jong u Bah HM Shangpliang MLA barim ka Mawsynram ki la pynïasoh noh sha ka party NPP ha kane ka sngi Ba-ar ha ka jingïalang kaba long Mawsynram.
Ïa kitei ki nongïalam ba radbah ka NPP la pdiang burom da u MDC ka thain Bah Alvin Sawkmie ryngkat ka jingdonlang u President bad Secretary ka NPP East Khasi Hills, Bah Jied Kurbah bad Bah Aibor Tynsong. La donlang ruh ha kane ka sngi naduh ka President jong ka Women’s Wing Kong Jasmine Lyngdoh, President ka NPYF ka distrik Bah Khrawbok Sohkhlet, Bah Mayborn nalor kiwei kiwei ki nongïalam ka party.
Lah ban kdew hangne ba dang shen u Bah HM Shangpliang u la resain noh na ka BJP ka party kaba u aireng ha ka elekshon MLA 2023 tangba u la shah rem.
Shwa kane, na ka liang u Bah Alvin ba dei ruh u President ka NPP Block u la pynpaw ïa ka jingkmen ban ïoh pdiang burom ïa u Bah Hima sha ka party NPP. U la pynpaw ruh ïa ka jingkmen ba utei u rangbah u shim bad burom ïa u kum u para ym tang ha ka saiñpyrthei hynrei ruh ban ïa trei lang na ka bynta ban kyntiew ïa ka roi ka pa bad ki nongshong shnong jong ka constituency.
“Ha Mawsynram kam pat ju jia kumne ba arngut ki nongïalam jong ka thain kin wanlang ha kajuh ka shatri ha kajuh ka jingmut na ka bynta ban shakri khambha ïa ki paidbah ka constituency. Ha ki khyndiat taiew ba la don ka jingïakren na ka liang ki bor pynïaid ka party ki la kylli ïanga, hynrei nga la pynpaw ba nga dap da ka jingkmen kaba khraw halor ka jingwan jong i,” u la ong shuh shuh.
Katba na ka liang u Bah Shangpliang u la ong ba kum u MLA ha ki san snem kum u MLA ba don ha ka liang pyrshah u la tangon ïa ka sorkar hynrei haba poi pat ki khep ba u hap ban pan jingïarap na bynta ki paidbah ka thaiñ ki nongïalam ka sorkar khlem pynslem ki pynsngew ïa ka jingkyrpad jong u.
“U Conrad, Bah Prestone bad Bah Sniawbhalang ki dei ki rishot jong kane ka jylla na ka bynta ban wanrah ïa ka roi ka pa ha ka jylla baroh kawei,” la bynrap biang u Bah Shangpliang.
Nalorkata, u ong ruh ba da ka jingwan ban ïatrei lang kawei bad u Bah Alvin kum u para, kin sa lah ban leh bun ki kam pynroi na bynta ki paidbah la ka long naduh ki lynti syngkien, ki surok, ki iing baduk bad kiwei kiwei.
La ïoh ruh ïa ka jingkren na u President ka NPP East Khasi Hills , Bah Jied Kurbah, nangta na ka President Women’s Wing Kong Jasmine Lyngdoh, President NPYF East Khasi Hills, Bah Khrawbok Sohkhlet bad ruh na u Bah Rudy Shangpliang uwei na ki nongïalam jong ka BJP ba wan ïasoh sha ka NPP nalor kiwei kiwei.
Ha katei ka sngi la pynbna ruh ba ka NPP ka la pynkhreh ban pdiang burom ha kane ka sngi Balang ïa u Bah Shangpliang ha nongbah Shillong ha kaba baroh ki heh ka party kin wan ban donlang.