Lah ban phah noh ïa ki Bus skul sha kiwei ki District
![](https://mawphor.com/wp-content/uploads/2023/06/STEMS-1.jpeg)
Shillong, Nailur 11 : U Myntri ka tnad pule puthi u Rakkam A Sangma mynta ka sngi u la ïathuh ba u la ai jngmut ïa ka jindonkam ban phah noh ïa ki bus skul rong stem jongka Sustainable Transport and Efficiant Mobility Society (STEMS) programme na ka bynta ki skul bad college jong kiwei pat ki district namar ym don ba treh ban shimti ïa ki hangne ha nongbah Shillong.
“ Lada ym don ba kloi ban shimti hangne ha nongbah Shillong ngi la dei ban phah ïa kine ki bus STEMS sha ki college bad skul jong kiwei pat ki district” ong u Rakkam haba ïakren bad ki nongthoh khubor.
U la ïathuh kiba bun ki kmie ki kpa kin don mon ban pynleit skul ïa ki khun da ki bus “ Kumta ngi la rai ban ïakren bad ka tnad Urban Affairs ba lada ki skul bad college ha kane ka nongbah kim kwah ïa kine ki bus ngi dei ban aiti noh ïaki sha kiwei pat ki dsitrict. Ngin sa ïakren ïa kane k kam bad ka tnad Urban Affairs shwa ban leh ïa kaba donkam” ong biang u myntri.
U la ong ka sorkar ka pyrshang ban ai ka jingshakri kaba myntoi ïa ki khynnah skul hynrei kumba ka paw ki kmie ki kpa kim mynjur satia namar kim don jingshaniah ban phah ïa ki khun lyngba kine ki bus.
Kumta namar ba ka sorkar kam lah ban pynkohnguh jubor ïa ki kmie ki kpa ne ïa ki bor pynïaid skul namar ka jingthmu ka long ban kham pynduna ïa ka jingdheng kali ha kane ka nongbah, ka sorkar mynta kam banse ban shu pynïeng ïa kine ki bus ha Inter State Bus Terminus (ISBT) kaba ha Mawiong naduh ba la dep pyllait paidbah ïa ki ha u Kyllalyngkot mynta u snem.
Ka jingthmu jong kane ka long ban pynduna ïa ka jingdheng kali ha kane ka nongbah . Namar hadien ba la dep lum jingtip la lap ba kumba 27,000 ngut ki khynnah skul bad samla pule ki dei kiba pule tang ha ki thaiñ Laitumkhrah bad Dhanketi bad kiba bun hi ki kmie ki kpa ki leit buh skul bad wan shaw skul ïa ki khun da ki kali shimet jongki. Kane ka la buh ka jingeh bad ka jingdheng kali kaba jur ha ka por ba wai skul na kata ka daw la rai ban thied noh da ki bus ban kit ïaki khynnah skul khnang ban kham pynduna ïa ka jingheng kali, ong u mynri.