Lahduh ka Hynñiewtrep ha ka ‘Shillong Open Khasi Knock-Out Cricket Tournament jong ka SS Mawroh

Shillong, Jymmang 07: Ka kynhun Hynñiewtrep ka la ïoh ban rah ïa ka nam ladhuh ha ka jingïalehkai Final jong ka “J.H. Lyngdoh Memorial Trophy-Shillong Open Khasi Knock-Out Cricket Tournament,” ba la pynlong da ka Seng Samla Mawroh ha ryngkat ka jingïatreilang bad ka Meghalaya Aids Control Society, Shillong ïa ka ba la pynhap pyrda noh hynne ka sngi ha madan jong ka LP School Mawroh, Kyntonlieh.
Kane ka jingïalehkai ka la long ka ba shongshit bad ka ba mar ïakhaid tad hadien ba ka kynhun Hynñiewtrep ka la lah ban pynrem noh da san wicket pyrshah ïa ka Lumshyiap.
Ha kane ka tournament ki la don haduh 32 tylli ki team ki ba la wan ïashim bynta, bad ka kynhun lahduh ka la ïoh ïa ka song pisa ka ba 50 hajar ha ryngkat ka trophy katba ka ba ar ka la ïoh 25 hajar ha ryngkat ka trophy ïa ka nam man of the match la ïoh rah da u Benny Lyngdoh bad man of series da u Richmond Nongdhar.
Ha ba ai jingkren kum u Kongsan ha ka jingïalang, u Bah PT Sawkmie ha ka ba nyngkong u la ai ka jingïaroh ïa ka Seng Samla Mawroh ka ba la lah ban pynlong ïa ki ba kum kine ki tournament ki ba i shongkun bad ki ba lah ban kyntiew ïa ki samla don sap ha ki jait jingïalehkai bapher bapher.
U MLA u ba la noh synñiang ruh sha ka Seng Samla na ka bynta ban pynlong ïa kane ka tournament ka jop, u la kyntu ruh ba kan ïai bteng ha ka ban pynlong ïa ki jingïalehkai sport bapher bapher khnang ban lah ruh ban kyntiew ïa ka imlang ka sahlang bad ka jaidbynriew hi baroh kawei.
U la kyntu ruh ïa ki samla ki ba don ha la ki jong ki sap ki phong ba ki dei ban don ïa ka thong bad ka mynsiem ïaleh khnang ba kin ïoh ïa ka jingjop ha ka jingim kaj ong ki. Kumba ka long mynta u la ong ba ka kam ïalehkai sport ka la kylla long kawei na ki lad kamai kajih ba kongsan.
Shuh shuh u la pynpaw ruh ka jingsngew sarong ban ïohi ba mynta ki samla Khasi ki la kiew shakhmat ha ki kam ïalehkai sport bad ki ba la leit ruh ban ïa aireng sha ki bynta bapher bapher jong ka ri. Ha kane ka jingïalang la ïoh ruh ka jingkren na u Bah PJ Lamare Rangbah Shnong Mawroh ha ka jingïadon lang ki nongkitkam jong ka Seng Samla Mawroh bad kiwei kiwei.