Nongstoiñ, Nailar, 27: Katkum ka jingïoh ujor na ka lïang ki paidbah ka thaiñ halor ka jingleh torti ki trai petrol pump ha ka rukom theh umphnïang ïa ki kali, ha kaba bun ki petrol pump jong ka thaiñ Riangdo, Nongstoiñ, Nongspung ki la shim kabu bha.
Ki paidbah ka thaiñ ki la ïohi ba don kiba thep duna ïa ki liter, don ruh kiba khleh da ka um ïa ka umphniang. Kane ka la wanrah ïa ka jingpynsniew ïa ki kali bad ruh ka la wanrah ïaka jingshim kabu ki trai jong ki petrol pump.
La kynnoh ruh ba don ruh ki nongtrei petrol pump khamtam kiba dei na bar jylla, ki sdang ban leh heh bad leh thlia bad ruh ban kren da ki ktien ki bym sngew tynnad bad bym lah pdiang ha ka im lang sah lang.
Ka jingleh torti jong ki trai ki petrol pump ka thaiñ, ka la wanrah ïa ka jingbitar jong ki paidbah bad ki paidbah ki la ud ïa ki jingsniew ki kali jong ki, hadien ba lah dep thep ïa ki Umphniang na ka daw ka jingkhleh da ka um ïa ki petrol bad diesel.
Kane ka jingud jong ki paidbah shaphang kane ka bynta ym ju don mano mano ban teh lehkam ïa kane ka phang khamtam na ka tnad sorkar kaba dei peit ha kane ka liang.
U General Secretary ka WKSU Central Body Mondaystone Lyngdoh, u la maham kaba tyngeh ïa ki trai petrol pump bad ki nongtrei, ba lada dang lap ba dang don kano kano ka jingleh torti ha ka rukom theh Umphniang bad ha ka rukom ban kren ïa ki ktien bym lah ban pdiang, ka seng kan ai da ka jingpynshitom kaba tyngeh bad ruh kan leit khang tala shisyndon.
