Shillong, Nailar 24: Lai ngut ki MLA jong ka UDP kiba kynthup ïa u MLA jong ka Mawphlang Bah Mathew Beyondstar Kurbah, u MLA ka Mawsynram Bah Olan Sing Suin bad u MLA ka Ranikor Bah Pius Marweiñ ryngkat ka jingsynran lang da da ki Engineer ka PWD, kata, u Superintending Engineer ka PWD Eastern Circle Bah AB Umdor, Bah A Syiemlieh, Executive Engineer PWD Mawphlang Division, Bah K Kharsyntiew lem ki kontraktor ha ka sngi Balang ki la hiar jurip ïa ka bynta ba la pyntrei ïa ka surok naduh Wah Umpamtiah sha Weiloi.
Kane ka jinghiar jurip ïa kane ka surok ka long hadien ba ki nongleit nongwan ki la ud ïa ka jinglong jingman jong ka surok kaba dang pyntrei ban pynheh na Wah Umpamtiah shaduh Weiloi ha East Khasi Hills. Ki nongleit nongwan ki la ud ba kane ka surok ka long halor ka jingktieh bad bun ki thliew ki syar, nalor ka jingpynhap mawria harud surok ka la pynwit ïa ka leit ka wan.
Ka jingsniew ha ka bynta jong kane ka surok, ka dei namar ba la don hapdeng ka jingpyntrei ban pynheh, kata ban kyntiew kyrdan na ka Single Lane sha ka Intermediate Lane, kaba la mang ha ka jinglut kaba la kot sha ka T.49 klur, kata kaba dei naduh Wah Umpamtiah haduh Weiloi, kaba jrong kumba 28.90 kilometer, ïa kaba la aiti sha ki ar ngut ki kontraktor ban pyntrei.
Kumba ka long, ka jingpyntrei ïa kane ka surok kaba la sdang naduh u bnai Kyllalyngkot mynta u snem, ka ladep kumba 20 persen bad ka por ba la buh ban pyndep ka dei haduh u bnai kyllalyngkot jong u snem 2025. Kane ka surok kaba mynta ka don kumba 3.75 meter bad kumta ka jingpynheh kan long sha ka 5.5 meter, kumta na ka liang ka PWD kan hap ban shim jaka bad mait ïa ki lum ne tei kynroh ban pynbit pynbiang ïa ka surok.
Ha ka jingïakren bad ki lad pathai khubor, kine ki lai ngut ki MLA ki la pynpaw ba ka jingjurip da la ki jong ki khmat, ka long hadien ba ki la ïoh pdiang ki jingujor na ki nongleit nongwan halor ka jingsniew kaba la buh jingeh ïa ka leit ka wan ka jong ki.
Ki la pynpaw ka jingkmen ban ïohi ba ka kam ka la ïaid shakhmat wat hapdeng ki katto katne ki jingeh ba ïadei bad ka jingshim jaka ban pynheh ïa ka surok, kaba ki la kyrmen skhem ba ka tnat PWD kan sa lah ban pynbeit.
Ki la kyrpad ruh ïa ki nongleit nongwan ba kin ïai shah lem shipor namar ka jingwanrah ïa ka roi ka par kam mut ba mar ïa wanrah kan bha beit naduh kaba sdang.
