Nongpoh, Nailar 23: U heh pulit ka jylla u Dr LR Bishnoi mynta ka sngi haka sien ba nyngkong u la leit ban ïakynduh ïaki samla pule ka Ri Bhoi College ha Nongpoh, da jingangnud ban pynsngewthuh paidbah halor ka jingma u drug bad kiwei ki jingdih buaid lyngba ka Awareness Programme.
Ïa kane ka prokram ban pynsngewthuh paidbah halor ka jingma u drok la pynlong daka tnad pulit jong ka Ri-Bhoi haka jingïatreilang bad ka Health and Hygiene Cell jong ka Ri-Bhoi College namar ka jingjyllei jong u drok ha Ri-Bhoi District ka ba dei ruh ka khyrdop ban rung bad mih naka jylla bad bun naki samla kila sdang ban kyrni bad ngop ha utei u jait jingdih buaid kaba la buh ïaka imlang ka sahlang hapdeng ka jingma kaba khraw namar ki kam tuh kam thiem bad kiwei kiwei ki kam sniew.
Ha kane ka program ai jinghikai la sakhi ruh da ka jingdonlang u Giri Prasad Superintendent of Police ka Ri Bhoi, Ishan Gupta Assistant SP, EC Benny Principal ka Ri-Bhoi College, ki heh pulit jong ka Ri Bhoi, ki nonghikai lem bad ki samla pule na katei ka College.
U Dr LR Bishnoi haba kren ha katei ka sngi, u la ong ba u drug u dei uwei naki jait jingdih ba ktah ïaka bor jabieng ban pynbuaid bad bun naki samla bala ngat ha u kim lah shuh ban bthah bad ban ieh, bad ka jylla Meghalaya kala don hapdeng ka jingma kaba khraw naka jingkynrei bad jur ki nongdih bad nongkhaii drok bad u la ong ruh katkum ka jingtip bala ioh lum haduh u snem 2019 kumba 2.5 lakh ngut ki samla kila ngop ha u drok bad kumba 45 hajar ngut ki dei tang ha Nongbah Shillong, bad da ka jingtrei shitom ka tbad pulit ka jylla kala ioh ban kurup ïa u drok ba shongdor kumba 124 klur bad ka pisa kumba 75 lakh haduh mynta.
U la ong ruh ba ka Ri Bhoi district kadei kawei naki district kaba la jur kiba la kyrni drok khamtam ka dei ruh ka lynti rung bad mih naka jylla, naka liang u tei u heh pulit ka jylla u la ai ruh ka jingbatai kaba bñiah sha ki samla pule shaphang ka jingtreikam bad ka jingma u drok lyngba ka Power Point Presentation da kaba kyntu ruh ïaki samla pule ba kim dei da lei lei ban ktah lane ban mad ïa u drok, hynrei ban long ki nongsam khubor ba bha sha ka imlang ka sahlang naka bynta ban rat diengkhong ïa u jait jingdih buaid.
