Shillong, Nailar, 23: Ka Khasi Students Union (KSU) ka la pan jingpynshai na ka tnat ka Koit ka Khiah jong ka Sorkar Jylla ha kaba ïadei bad ka bhah pule MBBS jong ka Jylla Meghalaya lyngba ka State Quota.
“Ka KSU ka la ïoh jingtip ha kaba ïadei bad ka bhah pule MBBS jong ka jylla Meghalaya lyngba ka State Quota, la don bun kiwei pat ki jaidbynriew kiba ïoh rung ha ka Open Category. Na ki 14 ngut kiba la shah jied ban leh Screening, don tang lai ngut ki trai ri lane ki riewlum katba 11 ngut pat ki dei na kiwei pat ki jaidbynriew bym dei riewlum,” la ong ka seng ha u kyrwoh ba la phah sha ki lad pathai khubor ha ka sngi Balang.
“Ka seng ka la ïoh jingujor ruh ba lehse kitei ki 11 ngut kim dei na ka jylla Meghalaya hynrei ki dei ba na jylla Assam. La don jingsuba ruh ba ki ïoh ïa ki kot ki sla na ka shnong Ampati, South West Garo Hills. Halor kane ka kynrum kynram, ka KSU ka pan jingpynshai na ka Sorkar Jylla hato kitei haneng ki dei kiba shisha ne kumno. Ka KSU ka dawa ruh ba ka Sorkar Jylla ka dei ban pyni paidbah ïa ki Aadhar Card bad EPIC jong kitei ki 11 ngut la ki dei neem ki nong Meghalaya bad kumjuh ruh na ki kolej aiu ba ki pyndep ïa la ki jingpule,” la dawa ka KSU.
“Ka Open Category ka dei na ka bynta baroh ki nong Meghalaya kynthup ruh ïa ki Scheduled Tribes ka jylla bad bunsien bun ngut ki Khasi ki ju ïoh ban rung ha kane ka thup kaba plie lad plie lynti pat ïa ki kiwei ki para Khasi ban rung na ka Khasi-Jaiñtia Category. Katei ka jingïoh rung khlieh da ki samla pule ba suba ba dei na shabar ka jylla kan pynduh lad ïa 11 ngut pat ki samla Khasi bad Garo kiba thrang ban ïoh pule MBBS,” la ong ka Seng.
“Sa kawei pat ka mat kaba ktah jur bha ïa ka jylla bad khamtam ïa ki samla ba dang shu dep pule Medical kiba dei na jylla ka dei halor ka jingkhot ïa ka Walk-in-Interview da ka Sorkar Jylla ïa 170 ki kam Contractual kiba dei ïa ki post Medical & Health Officer (70 tylli) bad ki post Specialists (100 tylli). Ka seng ka sngew namarba ki dei kiba kam kiba hap hapoh ka Sorkar Meghalaya kumta ka dei ban plie lad shwa ïa ki trai shnong ka jylla ym ban plie kyllum lang ïa baroh ki nong India bad ïa kito kiba na ka thaiñ Shatei Lammihngi,” la dawa ka Seng.
“Ka seng ka la buh jingkylli hato balei ym ailad ban long da ka eksam ban pynïaid da ka Meghalaya Medical Recruitment Board? Ki don bun ngut ki samla na jylla kiba la pyndep ïa la ki jingpule ha ka laiñ Medical bad katei ka jinglait haduh 170 tylli ki kam kan ailad ïa ki ban thep ïa kitei ki kam lada mang beit tang ïa ki nong Meghalaya hynrei sngew thamula ba ka Sorkar Jylla ka plie pynban ïa ka lad aikam aijam sha baroh ki nong India. Hato ka Health Department jong ka jylla Meghalaya ka dei jong ka jylla ne ka dei ka tnad Sorkar Pdeng? Ka KSU ka dawa na ka Sorkar ba ka dei ban pynbeit mar mar ïa kane ka kam bad kyntu ïa kaba ka dei ban long ka nongaikam ïa ki trai jylla ym ïa ki bar jylla,” la ong shuh shuh ka Seng.
