Shillong, Nailar, 23: Iwei i khynnah skul iba dang pule ha ka Class KG ha Laitumkhrah Presbyterian Higher Secondary School, Shillong i la lait thaw na ka tyrsim jong ki nongrah bor bar jylla kiba la leit pan jingbit na ka Principal jong ka skul ban pyllait noh ïa i da kaba shu thok shu lamler ba ka kmie jong ine i heprit ka don hapdeng ka jingshitom.
Katkum ka tyllong khubor ba la ïoh na ki Pulit, la ïathuh ba ha ka por 3.30 baje nohphai sngi, ki Pulit ki la ïoh jingtip na ki kmie ki kpa jong ine i khynnah skul ba ha ka 23 tarik u Nailar, 2023 ha ka por kumba 12.30 baje noh sngi, arngut ki briew kiba dei ki bar jylla ki la rung Laitumkhrah Presbyterian Higher Secondary School ban pan jingbit na ka Principal ban ïalam noh ïa ine i khynnah sha ing da kaba aidaw ba ka kmie ka la phah leit shaw noh namar ba ka don hapdeng ka jingshitom.
Shuh shuh la ïathuh ba ka Prinicipal bad ka Nonghikai kim shym la pyllait satia ïa ine i khynnah namarba kim shym la ithuh satia ïa kine ki arngut ki bar jylla.
Mar mar ki bor pynïaid skul ki la telephone sha ka kmie jong ine i khynnah ban phah shaw noh ïa ine i khun jong ka.
Ka tyllong khubor ka ïathuh ruh ba mynta hi ka sngi, ki bor pynïaid skul ki la ïathuh uwei khynnah skul uba dang pule ha ka Class-6 u lait phet da ka said na ka kti jong ki runar kiba la thmu ban rahbor ïa u katba u dang leit phai sha la ing.
Halor kane ka jingjia, ki Pulit ki la pynlong ka jingtohkit bad ka jingthwet kaba jur ban ïohkem ïa ki runar kiba donkti.
