Ka jingshah byrngem ki Pnar, ki Border Out Post bad u drok, pynsngew ka HYC ha u DGP

Shillong, Nailar, 22: Ka Hynñiewtrep Youths Council (HYC) ha ka sngi Baar ka la aiti da ka jingthoh ha u Director General of Police (DGP) ka Jylla u Dr. LR Bishnoi ban pynsngew halor ka jingshah byrngem dang shen jong ki Khasi-Pnar kiba sah ha khappud ha ka Karbi Students Association (KSA) na Karbi Anglong District, Assam.
“Ha ka jingïapynbeit pud, ki ar tylli ki Sorkar Jylla ki la rai ban ailad ha ka mon laitluid jong ki paidbah kiba sah ha ki jaka ba don ki jingïakajia pud ban rai shano ki mon ban leit sha kano ka jylla. Hynrei ha kine ki sngi, kawei na ki sengbhalang na Karbi Anglong ka la ong, lada ki shnong Khasi-Pnar ki rai ban ïasoh sha ka Jylla Meghalaya ka lah ban mih ka kynrum kynram kumba jia ha Manipur. Kane ka long kaei kaei ba ka seng kam lah ban pdiang. Kane ka long kum ka jingbyrngem ban phah shong jubor ïa ki briew ha Assam. Kane ka dei ka jingpyrshang jong kine ki kynhun ban pynbor ïa ki briew (Khasi-Pnar) ban don ha Assam,” la ong u President ka HYC u Bah Robertjune Kharjahrin ha ka jingïakren bad ki lad pathai khubor hadien ka jingïakynduh ïa u DGP.
“Ngi la kyntu ïa u DGP ba un shimkhia ban ai jingïada ïa ki briew jong ngi kiba sah ha khappud. Khlem ka jingïada ba pura kine ki briew (Khasi-Pnar) ki lah ban shah byrngem da kumne kumta bad ngim tip kaei ba kin rai ha ka sngi ba ki Regional Commitee ki hiar jurip. Ngi la pynbor ïa u DGP ba un pynthikna ba ka shongsuk shongsaiñ ka dei ban don ha khappud bad kam dei ban don kano kano ka kynhun ka ban byrngem byrsit,” la ong u Bah Kharjahrin.
“Khnang ba ka shongsuk shongsaiñ kan don ha khappud ngi la ai jingmut ba ki hynñiew tylli ki Border Outposts (BoP) bad ki Out-Posts (OP) ba thymmai dei ban pyntreikam pura ïa ki. Dei ban pynkhlaiñ ruh ïa ki BoP kiba la don lypa bad ban pynbiang ïa ki tiar ki tar, ki kali ban wanrah ïa ka shongsuk shongsaiñ,” la ïathuh u Bah Kharjahrin.
“U DGP u la ïathuh ïa ka jingduna jong ka bor Pulit bad ba kiba dang sdang pynrung thymmai ruh kim pat pyndep ïa ka jingshah hikai pyntbit. U la ong ban shimkhia ban pynbiang ïa ka bor Pulit namarba kim kwah shuh ban dang mih ki kynrum kynram ha ki shnong khappud,” u la bynrap.
Ha ka dorkhas ka seng ka la kdew ruh ba ka tnat Pulit ka donkam ban pynkhlaiñ ïa ka Infiltration Branch ban tehlakam ïa ka jingwanrung kyrthep jong ki mynder ri bad ki briew kiba nabar jong ka jylla.
“Kaba pynsngewsih ïa ngi ka long haba la don ka Directorate of Infiltration ngi kwah ba kin treikam. U DGP u la pyntip ba ka tnat Pulit ka don 19 tylli ki Infiltration Checkgate ha kylleng ka Meghalaya. U la pynpaw ba ka jingeh ka dei ka jingduna jong ki nongtrei. U la ong ba un sa khmih bniah ïa kane ka kam bad ban pynthikna ba ki poiwir kin ym ïohlad than ban rung ha kane ka jylla,” la ïathuh u President ka HYC.
U la ong ruh ba u DGP u la pyntip ba ka tnat Pulit ka la pynphai, ka la kem bad ka la pynngat kyndon ïa kiba bun ki poiwir nong Bangladesh kiba rung tuh ha kane ka jylla Meghalaya.
Kawei mat ba ka seng ka la pynsngew ha u DGP ka long ruh halor ka jingwan poi jong u drok nabar ka jylla sha kane ka Jylla Meghalaya.
“Lada ngi peit ïa ka jingai jingkheiñ da ki bor ka Sorkar Meghalaya, ngi ïohi ba ki briew, katba nang mih ki sngi, khamtam ki khun samla ki la nang ngop ha u drok. Haduh mynta ha Meghalaya kam don satia ka karkhana shna drok. Uba bun hi u drok u dei uba wan na bar ri bad nabar ka jylla. Ngi la ai jingmut, lada lah ban tehlakam ïa ka jingsuplai ïa u drok nabar ka jylla, lehse, kane ka jingïakhun jong ka Jylla ban ïakhun thma pyrshah ïa u drok kan long kaba jop,” la ïathuh shuh shuh u Bah Kharjahrin.
U la ïathuh ba ka seng ka la ai jingmut ba ka tnat Pulit kan ïatreilang da kaba pynlong ïa ka jingkhynra lang bad ki shipai Border Security Force (BSF), ka tnat Custom & Central Excise bad ban ïasam jingtip mar kylliang khnang ban khanglad ïa ka jingwan tuid u drok nabar ka jylla bad nabar ri.
“Ka tnat Pulit ka dei ban ïatreilang bad ki bor synshar shnong halor kane ka jingthmu bad ban talasi manla ka sngi ïa ki khyrdop rung bad mih jong ka jylla,” u la ong.