Ka sorkar kan pynthikna ban pyndep ïa ki jingtei ïa ki projek ha ka por ba la buh : CM

Shillong Nailar 21: U Myntri Rangbah ka jylla u Conrad K. Sangma hynne ka Lah Sngi U Blei, ula plie ïa ka ophis treikam kaba thymmai jongka Williamnagar Municipal cum Market Complex ha Soil Bazar, Williamnagar.
Ha katei ka jingplie paidbah la ïadonlang u Myntri ka tnad PHE u Marcuise Marak, u MLA ka Rongjeng u Jim Sangma, ki heh ophisar sorkar bad kiwei kiwei.
Haba kren haka jingïalang u Myntri Rangbah ula ong ba ka la don ka jingdawa kaba jur ïa ki jingtei ki bapher bapher ha kylleng ka jylla ba ka sorkar kan pynthikna ba dei ban pyndep ïa kitei ki projek hapoh ka por kaba la buh.
“Ka sorkar jong ngi ka ithuh ïa ki bynta kiba kongsan ba ki jingtei bad ki surok ki lah ha kaba pynïasoh ïa ka imlang sahlang, ban kyntiew ïa ka ïoh ka kot bad ban plie lad na ka bynta ban ïoh ïaka jingim kaba bha. Ka long kaba kongsan ïa ngi ban pynthikna ba iwei pa iwei i nongshong shnong kin ïoh jingmyntoi na kitei ki kam pynroi. Ngi don ïa ka jingangnud ba ka jylla Meghalaya, kan dei kaba ki briew kin ïoh ïa ki jingdonkam katkum kane ka juk kaba mynta, ka pule puthi kaba paka bad ki jaka ai jingsumar kiba paka” la ong u Myntri Rangbah.
Ha ka jingplie paidbah ïa ka Williamnagar Municipal Office cum Market Complex, u Myntri Rangbah ula ong ba kane ka dei ka sienjam ban pynbiang ïa ka jingdonkam jong ki nongshong shnong.
“Kane ka ïaid ryngkat bad ka jingïohi jngai ban kyntiew ïa ka rukom im bad ïa ka ïoh ka kot jong ki paidbah ka Meghalaya,” ula ong bad ka pyntip ba ki don bun ki bynta ki ban leh ha ka thaiñ Williamnagar, kiba kynthup ïa ka jingshna pyndep ïa ka surok, ka jingtei ïa ka mini stadium bad ban pynitynnad bad pynbhabriew ïa kane ka thaiñ.
Ula pynbna ruh ba ka sorkar kan shna pynbha ïa ka Rongrenggre Higher Secondary School, kawei na ki skul kaba la rim tam ha ka district, ban pynthikna ba kan don ka jingpynbha ïa kane ka jaka pule na ka bynta ka bit ka biang jong ki khynnah pule.
“Ban kyntiew ïa ki jaka pule, ka dei ka thong kaba hakhmat eh ka jong ngi bad ka jingshna pynbha ïa ka Rongrenggre Higher Secondary School ka pyni ïa ka jingthrang ka jong ngi ban pynbiang ïa ka pule ka puthi kaba paka na ka bynta ki samla” ong u Conrad.
Ha kane ka sngi u Myntri Rangbah ula pynpaw ruh ha kaba ïadei bad ki projek kiba dang ïaid shakhmat kiba kynthup ïa ka jingtei ïa ka Williamnagar College kaba la jan dep artad bad ka jingtei ïa ka Mini Stadium ha Williamnagar.
U Myntri Rangbah ula leit ruh ban jurip ïa ka surok kaba la shna thymmai ha ka shnong Rangmal Badim bad Chidekgre bad ula sam ruh ïa ka Digital Learning Aids (M-Tab) sha ki khynnah pule jong ka Williamnagar lyngba ka Chief Minister’s Digital Learning Aid for Students Scheme bad ula aiti ruh ïa ki tynrai Cinnamon sha ki nongrep jongka East Garo Hills District kum shi bynta jong ka Spice Mission kaba thmu ban pynkup bor ïa ki nongrep.
Nalor kane ula pyllait paidbah ruh ïa ki 3 tylli ki kali Bolero Pickup lyngba ka Mission Organic Value Chain Development of North Easter Region, Phase -I.