Nongstoiñ, Nailar 21: “Ka jingeh kaba hakhmat duh ban pynbeit ïa u pud u sam ha ka Langpih sector, ka dei namar ba ki paitbah jong ki shnong kiba don hapdeng ka jingïakajia kata naduh Dronpara, Nawapara, Bangjeng, Kamphaduli, Hasem, Talimara, Umdiangkop, Umdiensiar, Umdiengphiang, Rajapara bad kiwei kiba dei ki Garo, kim kwah satia ban weng lane pynduh noh ïa ki Election Photo Indentity Card, ki ration card bad ban pdiang ïa ki skhim kum ki skhim ba duk, ka skhim bording, ki skul bad kiwei kiwei ba ka sorkar Assam ka ai ha ki shnong ki thaw jong ki”, ong u bah P.Nongshlong sordar ka shnong Mawïaksyiem.
U bah Nongshlong haba ïakren bad u nongthoh khubor, u la ong ba u la pyrshang ban twad jignmut na ki paitbah jong kitei ki shnong baroh bad ki la ong ba kim kwah satia ban sah ha Meghalaya, namar ba ki ophis sorkar ki jngai palat bad ka sorkar Meghalaya ruh kam ju phai khmat sha kitei ki shnong ban ai jingïarap, la ka long ïa ki skul, ki surok, ka bording electric bad kiwei kiwei.
Hynrei ka sorkar Assam katba ki donkam ka ai lut kumta kim kwah satia ban weng noh ïa ki EPIC, Ration card Adhaar card bad kiwei kiwei ki kot kiba donkam ban sunmit sha ka sorkar haba pan jingïarap.
U bah nongshlong u la ong ruh ba ka shnong Mawïamsyiem, ka dei ka shnong kaba 80% ki paitbah nongshong shnong ki dei ki Garo bad ma u pat u la shah jied kum u sordar bad naduh ba u la shah jied kum u sordar, u la bthah ïa baroh ki nongshong shnong kat kiba la don kyrteng thep vote, kiba la shon Adhaaar ha Assam, ba lada ki kwah ban sah ha Meghalaya ki dei ban wan submit ha u khnang ba un pynpoi ïa ki sha ki bor pynïaid district jong k,a West Khasi Hills ba kin phah sha ka Election Commission ba kan tip bad ban pynrung noh ïa baroh ki kyrteng ha Meghalaya.
U la ong ruh ba baroh ki nongshong shnong ki la kohnguh bad ki la pynpoi lut ïa ki kot ki sla jong ki bad hadien ba ki bor pynïaid district jong ka West Khasi Hills ki la dep pynrung baroh ki la kmen bha.
Hynrei kaba pynsngewsih ïa u ka long ba hadien ba ka sorkar Assam ka la ïoh jingtip ïa kata, ka la phah ïa ki Ophisar na ki tnad treikam bapher bapher ban wan shim kyrteng ïa ki nongshong shnong kiba don kam ïa ki skhim naduh ki grant shna ïing, paiñkhana, madan ïalehkai, ïing skul bad kiwei kiwei ha kaba bun na ki nongshong shnong ki la ai kyrteng. Hynrei haba la pan ïa ki jingdonkam kum ki Adhaar card, Ration card, Bill light bad kiwei kiwei kim don shuh namar ba ki la dep submit lut ha u sordar.
U la ong ruh ba kito kiba bynnud ïa ki skhim na ka sorkar Assam, man la ka sngi ki la wan ïakynduh ïa u, ban pan ba un pynphai noh ïa ki kot donkam ba ka sorkar Assam ka pan na ka bynta ban ai jingïarap ïa ki. Hynrei u la pynshai ba lada ki kwah ban ïoh pat ki dei ban leit pan na ophis jong u Deputy Commissioner na Nongstoiñ, namar ïa baroh ki nongshong shnong la dep pynrung ha Meghalaya bad ba kin pan jingshai ba ka long ne em ba uwei u briew u lah ban ban on EPIC bad ban thep vote ha Megalaya bad ha Assam.
Lada u Deputy Commssioner u ong ba u nongshong shnong u don hok ban thep vote ar jaka kata ha Meghalaya bad Assam, te un sa leit ban ïakynduh ïa u Deputy Commissioner ka West Khasi Hills bad un sa kyrpad ïa u ba un pynphai noh khnang ba kin ïoh jingïarap na ka sorkar Assam bad na ka sorkar Meghalaya.
Lada u Deputy Commssioner u ong ba ka long kaba beaiñ ban don EPIC ha ki ar jylla bad ba uwei u briew un thep vote ar jaka, khlem artatien ki hap ban shah set patok. U la ong ruh ba kito kiba la kwah eh ban ïoh jingmyntoi na Assam ki la babe haduh katta katta namar ba kim don shuh ïa ki kot ba ka sorkar ka donkam.
