Shillong, Nailar 20 : Ka Wat Ba ar ka jingïakren ïasuk hapdeng ka seng HNLC , ka sorkar pdeng bad sorkar jylla kan sdang biang shen.
Ka tyllong khubor ba la ïoh ka ïathuh ba ki don katto katne ki mat kiba ka sorkar pdeng bad sorkar jylla ki dang ïa pynbeit lang shwa ban sdang biang ka jingïakren ïasuk ha ka wat ba ar.
Mynta la jan dap ar bnai ba ka jingïakren ïasuk ha ka wat ba nyngkong ka la kut namar ka jingïakren kaba nyngkong ka la long ha ka 24 tarik Jylliew 2023.
Ha katei ka jingïakren ha ka wat ba nyngkong ka seng HNLC ka la buh ïa ki katto katne ki jingdawa ba kynthup ïa ka jingmap noh ïa baroh ki jingpynngat kyndon ïa ki dkhot ka seng HNLC. ïa kane ki nongïalam ka seng ki la buh ha khmat u ksiang ka sorkar jylla u bah Peter S Dkhar IAS ba la shongthait bad u A.K Mishra IPS ba la shongthait uba dei u Advisor ka tnad kam pohïing ka sorkar pdeng uba dei peit ïa kane ka thaiñ shatei lam mihngi ka ri India.
Na ka liang ka seng HNLC kiba la wan ban mihkhmat sha ka jingïakren ïasuk ki kynthup ia u Vice Chairman bah Manbhalang Jyrwa, Political Secretary Aristerwell Thongni, Foreign Secretary Phrangkupar Diengdoh bad ki PSO pat ki long Rymphang Marwein, Storgy Lyngdoh, Aiborlem Marbaniang bad Raymond Lapang.
La ïathuh ruh ba ka jingïakren ïa pynbeit hapdeng ka HNLC, sorkar jylla bad sorkar pdeng ka ïai bteng beit na ka por sha ka por ban sdang noh ïa ka jingïakren ïasuk ha ka wat ka ba ar.
Dang shen na ka liang u Symbud Myntri Rangbah uba peit ïa ka tnad kam pohïing ha ka jylla u bah Prestone Tynsong u la ong ba ka sorkar ka shim khia bha ïa kane ka jingïakren ïasuk bad ka kwah ban poi sha ka thong bad ba kan long kaba seisoh bad baroh ka shong eh ha ka seng HNLC namar ka sorkar hi ka la dep pynpaw ba ka shim khia ïa ka kam.ïa kane u la kren hadien ba la saphriang ka khubor ba ki don kiba dawa pisa na ki heh saipan ka jylla ha ka kyrteng ka seng HNLC.
Ka HNLC ruh ka la dep pynshai ba kam don kti ha kane ka kam dawa pisa bad ka maham ruh ba lada ka lap ïa kiba shim kabu ha ka kyrteng jongka seng kan leh da kaba tyngeh.
“ Ka jingïakren ha ka wat ba nyngkong ka la ïaid beit bad baroh ki mat jingdawa ba la wanrah da ka seng HNLC la ïakren bad ki don katto katne kiba hap ban ïoh jingpynshai na ka sorkar pdeng. Kumta shen kan sa sdang noh ka jingïakren ha ka wat ka ba ar. Na ka liang ka sorkar pdeng bad sorkar jylla ki la long kiba la pynkhreh ban sdang noh ïa ka jingïakren ha kane ka wat ba ar bad ki dang ïa pynbeit tang katto katne ki mat shwa ban sdang noh ka jingïakren. Na ka liang ka sorkar ka kwah ba kane ka jingïakren ïasuk kan long kaba seisoh bad kan wanrah syndon ïa ka jingshong suk kaba ïaineh haduh kaba kut ha ka jylla bad kane ka thaiñ hi baroh kawei” ong u Symbud Myntri Rangbah.
