Shillong, Nailar 14 : Na ki 54 tylli ki Hima Khasi kiba don bad hap ha u pud u sam bad ka jingpeit jong ka Khasi Hills Autonomous District Council hynrei ki la don pat tang 11 tylli kiba wan ban shim bynta ha ka tamasa tynrai ne ka Monolith Festival kaba long ha u snem 2016 ha Mawphlang.
Katne ka long katkum ka jingïathuh hi da u Chairman jong ka Khasi Heritage Village Management Committee (KHVMC) ba dei ruh u Executive Member ka tnad Arts and Culture jong ka Council, Bah Victor Ranee hadien ka jingwan jurip ïa ka Heritage Village ha ka taiew ba la dep.
Ha kajuh ka por u la pynpaw pat ba kim lah satia ban tip ïa ka daw kaba pynlong ia kiba bun ki Hima ba kin ym wan ban shim bynta ha katei ka tamasa tynrai kaba long hynñiew snem mynshwa. “Hynrei mynta ka kynti nga kyntu bad khot nga wer ïa baroh ki Hima ba kin wan ban shim bynta bad pyni ïa ka jingriewspah ka Hima jong ki la ka long naduh ka put ka tem ne haduh ka shad tynrai bad kiwei kiwei ki jinglong kyrpang kiba don ha ka hima jong ki,” u la ong haba kren bad u Mawphor.
Lah ruh ban kdew hangne ba ha ka festival kaba long ha Mawphlang ka la khring ïa bun bha ki nongshong shnong ka jylla na ka Ri bad ruh wat na shaba ri ban wan sakhi markhmat ïa ka jingriewspah ka jinglong tynrai jong ka Jaidbynriew Khasi kaba dang don bad dang neh haduh mynta ha ki Hima bapher bapher.
Na ka liang u MDC ka Mawphlang ba dei ruh u Lamphang ka KHADC, Bah Lamphrang Blah u la pynkynmaw ba wat u Myntri Rangbahduh ka Ri, u Narendra Modi ruh u la wan ban iuhkjat bad peit ïa ka jingitynnad jong ka Heritage Village kaba pynbit pynbiang bad pynitynnad da ka KHADC ryngkat ka jingïatrei lang bad ka Hima Mawphlang.
Kumban shu kdew hangne ha katei ka jingleit jurip na ka Council ki la lap ruh ba jan baroh ki iing treh ban pyni nam kiba la tei ha katei ka jaka ki la jot lut bad ki la donkam ban maramot pynbha. Halor kane ruh na ka liang ka Council ka la rai ba kin phah maramot lut ha shwa ba kin pynlong ïa katei ka tamasa kaba ki la buh ban pynlong ha u Nohprah mynta u snem.
