Plie paidbah u DC ïa ka surok dewbilat kaba 550 mitar bad ka lynti iaid kjat ha shnong Pamrakmai
Khliehriat iaiong 5: U Deputry Commissioner ka East Jaiñtia Hills District, u Abhilash Banarwal, IAS mynta ka sngi u la plie paidbah ïa ka surok dewbilat ban ïaid kali (Cement Concrete) kaba jrong 550 mitar bad kawei ka lynti iaid kjat kaba jrong 680 mitar ha shnong Pamrakmai, kiba la pyntrei da ki skim shi spah sngi.
Ha kane ka prokram, la pyn kup burom ruh ïa ki trai jaka kiba la ai sngewbha ïa ka jaka ha kaba la ioh ban shna ïa ka surok bad ka lynti iaid kjat kaba long shibynta ban wanrah ïa ka roi ka par, ka bha ka miat hapoh shnong poh thaw, kumjuh ruh la pynkup burom ïa ki nongkitkam kiba nyngkong eh jong ka Village Employment Committee jong ka shnong kiba kynthup u Chairman VEC, u bah Archi Siangshai bad u Secretary ba nyngkong, u bah Phringstar.M.Pariat.
Haba kren ha ka jingïalang, u Abhilash Banarwal, ula ai ka jingïaroh ïa ki nongïalam shnong bad ïa ka VEC kiba la trei shitom bad kiba pyntrei hok ïa ki skhim, u la ong ruh ba u long la kloi ban ai ka jingïatreilang bad ka shnong ha Kano Kano ka por.
Kumjuh ruh u BDO Wapung C&RD Block, u la kyntu ïa ki nongshong shnong ba kin nang ai shuh shuh ïa ka jingïatreilang, u la kular ba na ka liang ka ophis ruh Kan sa ai shuh shuh ïa ki skim kiba kyntiew ïa ka shnong ban warah ïa ka roi ka par.
Na ka liang ka Dorbar Shnong Pamrakmai, kala aiti ruh ïa ka memorandum ha u Deputy Commissioner bad lyngba kane ka memorandum, ka shnong ka kyrpad ïa u Deputy Commissioner ba un sngewbha ban thaw ki lad ki lynti ban pynioh ia ka ïing Dorbar Hall kaba thymmai ïa ka shnong, u Secretary Shnong Pamrakmai, u bah Wellson. R. D. Siangshai, la ong ba na ka liang u DC u la kular ban pynïoh ïa kane ka jingkyrpad ka Dorbar Shnong.
BDO Ha kane ka sngi la ïa don ryngkatlang ruh u Block Development Officer jong ka Wapung C&RD Block, u bah N Saioo, u Waheh Shnong ba rim, u bah Hilarius Siangshai, ki nonghikai skul, ki khynnah skul bad kiwei kiwei ki riew rangbah jong ka shnong.
Ia ka prokram la pynïaid da u Waheh Shnong, u bah Iaikiewbha Rymbai, la ïoh ïa ki kyntien pdiangburom na u Chairman Shnong, u bah Jamris Siangshai bad ki kyntien ai khublei na ka Secretary VEC ka kong Ronica Dkhar.