Ki lehnoh ba la siew tulop da ka sorkar ki la sïat ïap ïa u hymmen jong nga: Bah Gray

Shillong, Nailar, 13: U Bah Granary Starfield Thangkhiew u la pynpaw ïa ka jingsngewsih kaba dang neh haduh kine ki sngi haba pynkynmaw ïa ka miet kaba u lyoh badum u la taplup ïa ka iing ka sem baroh kawei haba ki Pulit ka Jylla ki la dkhat jubor ïa ka jingim jong u Bah Cherish Starfield Thangkhiew ha ka miet synñïa 13 tarik, Nailar, 2021.
U Bah Gray u la pynpaw ïa kane ka jingsngewsih hakhmat ki bahahïing hasem bad ki dkhot jong ki sengbhalang bapher bapher ha ka jingleit buh syntiew ha ka lyngkhuh sngi ïap ba ar snem jong u Bah Cherish ha u lum jingtep ha Lawmali ha ka Sngi U Blei ryngkat ka jingsakhi lang jong ki nongïalam ka Hynnñiewtrep National Liberation Council (HNLC) kiba dang don ha kane ka Jylla Meghalaya na ka bynta ka jingïakren ïasuk bad ka Sorkar.
“Ki lehnoh ba la siew tulop da ka Sorkar jong u Conrad Sangma hapoh ka jingïalam jong u commander u SP ka East Jaiñtïa Hills u Jagpal Singh Dhanoa ki la wan dkhat jubor ïa ka mynsiem u hymmen jong nga ha ka miet shiteng synñia ka 13 tarik Nailar, 2021 ki la wan rung jubor ban dkhat ïa ka mynsiem jong i khlem da ailad ban ïasaid da lade ïa lade. Ym tang katta, ki la pynjulor ruh ïa ka ïing ka sem bad ki la shoh la dat ruh ïa ki arngut ki khun shynrang. Kane kan sah histori ïa ka jingleh donbor jong ki lehnoh Sorkar ba la siew tulop da ka Sorkar bad la dkhat jubor im im peit peit ïa ka jingim briew khlem da kheiñ shuh,” ong u Bah Gray.
Haba khot bad wer ïa ka jingïatylli, u la ong, “kum ka jaidbynriew ngi donkam ban ïa tylli kawei namar na ka por sha ka por lada ngim ïa tylli kin sa shu dkhat iwei hadien iwei kat ïa uno uno uba leh nongïalam. Kita ki dei ki ‘hidden agenda’ jongno re jongno ngim lah ban batai.”