Shillong, Nailar, 13 : U President jong ka United Democratic Party (UDP) u Bah Metbah Lyngdoh u la pynshai ba u Bah Bindo M. Lanong u dang dei hi ruh u dkhot jong ka United Democratic Party (UDP) watla um shym la shah jied shuh kum uwei na ki nongkitkam bahakhmat eh jong ka party ha ka General Council kaba la long ha ka sngi Saitjaiñ ha nongbah Shillong.
Ha ka samoi treikam jong ki snem baladep, u Bah Bindo Lanong u dei u Senior Working President jong ka Party.
Ha ka jingïakren bad ki lad pathai khubor, u Bah Metbah u la ong ba ka jingjied ïa ki nongkitkam jong ka Party ka dei ka bynta ba ka UDP ka la bynshet ha ka Nomination Committee.
La sakhi ruh ba u Bah Bindo Lanong uba long uwei na ki dkhot ba la rim bha jong ka UDP bad uba la don bynta ban pynkha ïa ka UDP ha ki snem ba la leit noh um shym la don satia ha kane jingïalang.
Ka jingpynïajngai jong u Bah Bindo ïalade na ka UDP ka long hadien ba ka UDP kam shym la ai tiket ïa u ha ka elekshon MLA 2023 ba un ïakren na Nongkrem Constituency namarba ka party ka ladep ïa pynbeit ban pynïakhun da u Bah Lambor Malngiang bad ka la ailad ïa u Bah Bindo ba un ïakhun na Laitumkhrah Constituency.
U Bah Bindo u la rem ha ka elekshon MLA ha u President ka Voice of the People Party (VPP) u Bah Ardent M. Basaïawmoit.
